Видз-му овмöслы «козин».

Республикаын бара на донсялiс автомобильяслы ломтас. Медуна содiс дизельнöй ломтас.
Oнi литр Аи-92 бензинысь ковмас мынтыны 24 шайт, Аи-80-ысь - 21 шайт да 20 ур (донсялiс 60 ур вылö). 80 ур вылö содiс солярка, öнi сылöн доныс - 25 шайт 50 ур. Татшöм жö доныс
Аи-95 бензинлöн. Дерт, тайö донсялöмыс ёна инмас видз-му овмöс предприятиеяслы, кодъяслöн öнi пöсь кад.

Вячеслав УСОВ.
Парма гор  29.07.2008

Сьокыдлунъяс веномон.

Помöсдiнса видз-му вöдитысь котырын силос заптö механизируйтöм звено. Oнi уджалö Скöрöдумын. Агрегатъяс вылын зiльöны А.Ф. Пыстин да М.А.Попов. Веж масса ваялöны водительяс А.Е.Уляшев да И.К.Пашнин.
- Июль 20 лунöдз гуö сюйисны 35 гöгöр тонна, - висьталiс мехзвеноöн веськöдлысь И.В.Игнатова. - Вермим вöчны унджык, но падмöдö техника. Ставыс важиник, ёна жугласьö. Сэсся зэв ичöт удждон. Муöдз копыр ветеранъяслы. Пыр уджалöны, кöть удждон прамöя оз аддзывны. Выль йöз татчö оз локны,   ставыс кутчысьö на вылын. Велалöмаöсь уджавны му дорын, со и пессьöны. Сiдз, Скöрöдумысь водитель И.К.Пашнинлы 59 арöс, а пыр руль сайын. Бадьёльйьшысь водитель А.Е. Уляшев видз-му овмöслы сетiс 30 во.
Зiль йöз отсöгöн Помöсдiнса видз-му овмöс котыр ставсö вöчö сы могысь, медым тöв кежлö чукöртны тырмымöн кöрым. Мехзвеноса войтырöс, медым видзтыны кад, вердöны столöвöйын. Быд лун татчö кежавлö 30 да унджык морт. Татчöс кöзяйка Ю.М. Карманова тöждысьö сы вöсна, медым пыр вöлi пöтöса сёян. Мехзвеноса войтыр ошкöны аньöс тöждлунысь.

Гижис Александр Шебырев .
Парма гор 31.07.2008

http://www.komipress.ru/smi/issues.php?id=5

Тöв кежлö школа дась.
   
   Школаса быд директорлöн гожöмнас öти «юр висьöм» - сентябр 1 лун кежлö дасьтысьöм. Ставлы окота, мед челядь пырисны сöстöм, выльысь краситöм жыръясö. А мичыд ачыс оз артмы, колö ёнакодь уджавны. Мый вöчöма да мый нöшта колис вöчны? Та йылысь висьталö Помöсдiн шöр школаса директор Фрида Эмануиловна ЛИНДТ.
   - Миян школа нёльлаын, зданиеяс öта-мöдсьыс вель ылынöсь. Уджыс нёль пöвста. Медъёна майшöдлiс 2-öд номера школа, кöнi велöдчöны 7-9 классъяс. Важöн нин бикöд водзсасьысь да мукöд органъяс тшöктылiсны вежны став электропроводкасö. Сьöм корсим асьным. Кыз уджсö эштöдiм. Быдлаын выль кабель, электрощитъяс. Öнi сэсся некод нин оз «крукышт».
   Быдлаын краситчим. Классъяс мавтны краскаöн отсыштiсны бать-мам, а коридоръяс, актöвöй залъяс да мукöдтор -предпринимательяс. Аттьö С.Е.Пономаренколы, Д.А. Уляшевлы да С.А.Игнатовлы. Таво отсöг вичмис и образованиелöн управлениесянь, вичмöдiс 400 килограмм краска.
   Вайим 60 выль парта да 120 улöс. Коркö, гашкö, и став мебельыс выльмас. Майшöдлö, мый ог вермöй тырвыйö вöчны сантехническöй уджъяс: оз тырмы сьöм. Ог вермöй вежны весиг ва кранъяс да вентильяс. Весалiм шонтысян системаяс 2 да 3-öд номера школаясын, спортзалын.   
   Коли нöшта кыклаысь. Нöшта майшöдланатор -начальнöй школа. Мукöдсьыс выль, но виялö вевтыс. Райбюджет сы вылö вичмöдiс сьöм, ёна надейтча, мый эжасны профнастилöн.
   Колö вöчны выль мастерскöй. Стрöйба эм, но выльмöдны сьöм районсянь эз на чукты. Мастерскöй сиктса администрациялöн керкаын. Сэнi сылы абу места. Администрациялы аслыс колöны содтод жыръяс.
   Торъя сёрни спортзал йылысь. Дас сайö во лэптiсны да бöрыннас гöгöрвоисны, мый войвьшлы оз лöсяв. Некутшöм йирк абу, сöмьш шипера вевт. Кольöм 15 воöн лöсьöдiм öшöдöм йирк, резьöдлiм стенъяс да эжим изоплитаöн, но век кöдзыд. Тöвнас велöдысьяс урок нуöдöны пасьöн да шапкаöн. А  челядьлы лоö быть пöрччысьны, кöть санитарнöй нормаяс серти занимайтчыны оз позь. Батареяяс век пöсьöсь, но шоныд залас оз öшйы, пышйö. Быдлаын розьяс. Ковмас поньтасьны водзö.
   А сiдзсö ми öнi нин вермам шуны: сентябр кежлö дасьöсь. Велöдчысьяс пырасны сöстöм, югыд классъясö. Унатор удайтчис вöчны. Но ставсö öти здукöн он шамырт. Нёль керкаад век мыйкö вочасöн киссьö. Но миянöс сы вылö и пуктöма, мед ас кадö дзоньтасьны. Главнöйыс, мед унджык сьöм да мукöд отсöг чуктiс районсянь.

Александр ШЕБЫРЕВ.
Парма гор
14.08.2008

ЫДЖЫД ВЕРМÖМЪЯСЛÖН ВОЯС.

   1968 вося январ тöлысьын нёль колхоз подув вылын котыртчис «Помоздинскöй» совхоз. Öтувтiсны КПСС-лöн 22-öд съезд нима (Помöсдiн), «Россия» (Скöрöдум), Жданов нима (Бадъёльйыв) да «Вöр фронт» (Вöльдiн) колхозъяс. Кад воис мынтöдчыны лагер сяма котыръясысь, кöнi йöзлöн эз вöв некутшöм вöля, эз сетлыны сьöм, мырсьылiсны трудодень вылö, кытысь эз позь некытчö мунны.
   Совхозлöн оласног да удж торъялiсны колхозсаысь. Лоисны рабочöйяс, механизаторъяс, инженеръяс. Налы босьтчисны вештысьны. И эз лёка. Медводдза директорöн пуктiсны Дмитрий Александрович Беляевöс. Сiйö сяммис чукöртны ас гöгöрыс вежöра специалистъясöс. Уджö сюртчисны главнöй зоотехник Иван Геннадьевич Попов, главнöй инженер Нафанаил Дмитриевич Попов, главнöй экономист Павел Григорьевич Уляшев да мукöд. Аотделениеясöн веськöдлысьясöн лоисны вöвлöм колхозъясысь председательяс - И.А.Дёмин, Н.С. да Е.М.Уляшевъяс, мукöд.
   Овмöс котыртчан воын нёль отделениеыл вöлi 1594 юр гырысь скöт: 625 мöс, 201 порсь да 286 вöв. Подулыс вöлi крепыд. Вочасöн скöт лыд нöшта содiс. 1975 воын вöлi нин 1999 мöс да кукань, на лыдын 790 лысьтан мöс. 1986 воын пемöсъяслöн лыд воöдчис нин 2470 юрöдз. Вöлi 939 лысьтан мöс.
   Колхоз серти ёна кыптiс удж производительносьт. Медводдза воын быд мöслысь шöркодя лысьтiсны 1824 килограмм йöв, 1986 во кежлö лыдпасыс качис 2816 килограммöдз.    Бадъёльйыв отделениеыл быд мöслысь лысьтiсны матö 3200, Сордйыв фермаын - 3400, Выльгорт фермаын - 3274 килограммöн. Гöгöрвоана, мый пыр унджык и иналiсны йöвсö.
   Совхоз кыпалiс йöзлöн зiль уджöн. Бур кывйöн колö казьтыштны скöт дорын уджалысьясöс, торйöн нин дояркаясöс. Унаöн вуджисны 3 сюрс килограмма тшупöд. Тайö Роза Григорьевна, Аида Ивановна, Анна Семёновна Уляшеваяс, Августа Федосеевна Бизина, Зинаида Егоровна Карманова, Мария Александровна Игнатова, Евдокия Васильевна Карманова, Дина Николаевна Попова да мукöд.
   Кукань видзысьяс пöвстысь медводз колö пасйыны Мария Васильевна Игнатоваöс, кодлöн öти пемöс суткиöн тшöглiс 970 граммöдз. Таысь вылынджьж тшупöд совхозын сэсся некод эз шедöдлы. Елена Прокопьевна Игнатовалöн, Анна Тимофеевна Уляшевалöн да Валентина Егоровна Курочкиналöн (Помöсдiн отделениеысь) суткиöн куканьяс тшöглiсны 800-900 граммöдз. Зэв бура уджалiс Вöльдiн отделениеысь Мария Прокопьевна Игнатова. Бурöн нималiсны Нина Семёновна Игнатова, Валентина Александровна да Ольга Степановна Кармановаяс, Елизавета Степановна да Ирина Васильевна Уляшеваяс.
   Дыр уджалiсны трактор вылын Ювеналий Иванович Мингалёв, Василий Михайлович да Иона Фёдорович Уляшевъяс, Иван Егорович Ефремов, Алексей Константинович Шомысов, Иван Сидорович Липин, Борис Давыдович Игнатов. Шофёръяс пöвстысь бурöн колö казьтыштны Иван Степанович да Александр Степанович Пашнинъясöс, Валерий Иванович Уляшевöс, Егор Константинович Кармановöс.
   Кыпалiсны выль фермаяс. Ыджыд киподтуйöн нималiсны Егор Иванович Мингалёв, Геннадий Васильевич Бизин, Вениамин Сергеевич, Николай Илларионович да Михаил Сергеевич Игнатовъяс, Иван Николаевич Лютоев, Евгений Иванович Жангуров, Геннадий Модестович Пашнин, Борис Степанович Чисталёв.
   Коми Республикаса заслуженнöй уджалысьлысь ним сетiсны Иван Геннадьевич Поповлы, Василий Степанович да Александр Федосеевич Игнатовъяслы, Анна Гавриловна да Валерий Иванович Уляшевъяслы. Нималöны и талун Михаил Амосович Пашнин (вöвлöм директор), Михаил Васильевич Курочкин (уджавлiс главнöй инженерöн, а сэсся Помöсдiнса администрацияöн веськöдлысьöн), Владимир Анатольевич Рогожников (талун веськöдлö видз-му кооперативöн), Татьяна Владимировна Уляшева (райсöветса депутат, кооперативса председательöс вежысь), Елена Васильевна Карманова (Помöсдiн фермаса вöвлöм веськöдлысь). Степан Владимирович Игнатов, кодi уджавлiс главнöй экономистöн, öнi веськöдлö Москваын Коми Республикалöн представительствоöн.
   Виталий Степанович Пашнинöс пасйылiсны Октябрскöй Революция да Трудöвöй Гöрд Знамя, Агния Егоровна Шомысоваöс - Трудöвöй Гöрд Знамя да «Знак Почёта», Фёдор Васильевич Хозяиновöс - Октябрскöй Революция, Дина Николаевна Поповаöс, Юрий Степанович Курочкинöс да Иван Сидорович Липинöс - «Знак Почёта», Мария Николаевна да Ливерий Фёдорович Уляшевъясöс - коймöд тшупöда Трудöвöй Слава орденöн. Вель уналы вичмис СССР-са ВДНХ-лöн медаль.
   90-öд воясса «перестройка» кисьтiс странаын олöм, тшöтш и «Помоздинскöй» совхозöс. Бырисны отделениеясын фермаяс да кукань гидъяс, чинiс скöт юр лыд, пышъялiсны уджалысьяс. Но öтувъя овмöс дзикöдз эз на быр. Сьöкыдпырысь, но кутчысьö кооператив. И таысь аттьö уджалысьяслы. Век на кутöны лача.
   Колö чайтны, юбилейсö кыдзкö пасъясны. Ми водзвыв чолöмалам ставнысö, кодi уджавлiс «Помоздинскöй» совхозын, тайö юбилейöн да сиам водзö вылö выль вермöмъяс.

Александр ШЕБЫРЕВ.
Парма гор.
06.09.2008

ЛÖСЯВТÖМТОР.

   Биысь видзчысян службаын бара вежсьöмъяс. Лоасны федерациялöн да республикалöн тшупöдъяса часьтъяс. Кулöмдiнса лоас федерацияса, а Помöсдiнса, Зимстанса да Югыдъягса - республикаса. Воськолыс гöгöрвоана: кокньöдны МЧС-öс, сöлöдны биысь видзчысян удж республикалöн, а коркö, гашкö и, муниципалитетлöн бюджет вылö. Лоас кö тадзи, вöлисти воас пом. Ми тöдам, кутшöм «озырöсь» талун муниципалитетъяс.
   Миян странаын быд вежсьöм ачыс би кодь. «Кöсъям бурджыка, а артмö, кыдзи и век...» Правильнö шулiс Черномырдин. Oтувтöны Помöсдiнса, Зимстанса, Югыдъягса да Сторожевскса часьтъяс, а штабсö кöсйöны вöчны Кöрткерöсын. Oнi быд здукö позьö лэччывны Кулöмдiнö, сёрнитны телефонöн, а Кöрткерöсад быд здук он котöрт да ёна он сёрнит. Ставыс кутас сёрмыны, мый билы кивыв.
Александр ШЕБЫРЕВ.
Помoсдiн.

Парма гор.
09.09.2008

ВЕЛÖДНЫ ДА ВЕЛÖДЧЫНЫ ШКОЛА ДАСЬ.

   Заводитчис выль велöдчан во. Восьтiсны öдзöсъяс школаяс. Югьялысь, выльысь мавтöм классъясö пырисны велöдчысьяс. Гожöмбыдся дзоньтасян уджъяс эштiсны. Кöнкö унджык удитiсны вöчны, кöнкö - этшаджык.
   Помöсдiнса шöр школаын таво ёна уджалiсны-дзоньтасисны. Унатор вöчöма, но уна на коли и вöчтöмыс. Та йылысь миян сёрни Помöсдiн шöр школаса директор Ф.Э.ЛИНДТКÖД.
   - Сентябрь 1 лун паныдалiм, кыдз колö, - висьталö Фрида Эммануиловна. - Медводдза звöнокöн, линейкаöн. Поводдя вöлi лёк да, ковмис чукöртчывны спортзалын. Первой классö таво локтiс 28 ичöтик морт, колян восяысь 10 вылö унджык, и таысь нимкодь. Сэк жö 5-9-öд классъясын велöдчысь лыдыс чинiс 10 морт вылö. А выпускникъяс кузя кö, то колян во лэдзим 60 мортöс, таво лоö сöмын 35. Кутам лача, мый челядь лыдыс сиктын вочасöн содас.
   Гожöмнас ёна лои ноксьыны. Школьникъяс пырисны сöстöм, югыд классъясö. 1, 6, 7 да 8 классъяс пуксисны выль партаяс сайö. Татшöмыс водзын эз вöвлы, колö шуны аттьö отсалöмысь РУО-лы. Надейтчам, мый и водзö вылö воасны выль партаяс. Окота, мед бурмисны челядьлöн велöдчан условиеяс. Миян школа меститчö 4 стрöйбаын, öнi ставыс бур вевтаöсь. Ена майшöдлiс начальнöй школа, ыджыд зэръяс дырйи быдлатi виялiс. Талун зэрысь ни лымйысь повны оз ков -вевттьысис сэнi «Лысва» стрöитчан котыр. Аттьö налы.
   Дзоньтасьöмö ыджыд пай век пуктöны бать-мам. Налы абу веськодь, кутшöм жыръясын велöдчöны челядьныс. И таво отсалiсны ньöбны краскаяс да мукöдтор. Уна во коставлöм мысти мичмöдiм-мавталiм сiдз шусяна öтувъяинъяс: актöвöй залъяс, вердчанiнъяс, библиотека, туалетъяс да мукöдтор. Та вылö краска вичмöдiс РУО.
   Дыр кадся юр висьöмöн вöлi важ электропроводка. Важöн нин колiс вежлавны, да киным эз судзсьыв. Пöжарнöйяс пыр öлöдлiсны. Таво гожöм дзоньнас вежлалiм электропроводкасö 2 номера школаысь да джынвыйö 4 номераысь. Быд школаын (3 номераысь öтдор) сiдз шусяна «лунъюгыд лампаяс», прöстöй лампочкаясысь вочасöн öткажитчам.
   Но унатор на колö вöчны. Ена майшöдлö спортзал. Некыдз оз öшйы шоныдыс, 5 градусысь водзö оз кыпав. Быд ногыс нин поньталiм, но тöлкыс этша проектыс оз лöсяв войвывлы. Колö ёна дзоньтавны, торйöн нин стенъяс. Надейтчам районлöн отсöг вылö. Мöд майшöг - мастерскöй. Талун челядьлöн труд урокъяс мунöны сиктса администрациялöн стрöйбаын. И сэк жö школакöд орччöн сулалö кирпичысь кыпöдлöм вöвлöм шöр котельнöй. Сiйöс дзоньталöм вылö колö сьöм. Куим во нин тайö юалöмсö кьшöдам, но сьöм эз на чукты. Став надея райсöветса депутатъяс да райадминистрация вылö. Колö заводитны уджъяссö кöть нин вочасöн. Вöчам кö ассьыным мастерскöйяс бур лоö и челядьлы, и бать-мам аттьö шуасны. Талун миян школаын 365 велöдчысь. Öнiя кадö - абу этша. Лöсьöдны налы бур велöдчан условиеяс - миян медшöр мог. А велöдны да велöдчыны ми дасьöсь.

Сёрнисo гижис Александр ШЕБЫРЕВ.
Парма гор
23.09.2008

ЧЕДЯДЬЛÖН ОТСÖГÖН.

   Помöсдiнса СПК-лы картупель босьтны таво бара отсалiсны школьникъяс. Ставыс закон серти. Удж вылö петтöдз челядь бать-мамкöд сёрнитчöмöн гижисны шыöдчöмъяс. Кодi эз кöсйы петны му вылö -велöдчис. Ичöтдырсянь челядьöс удж дiнад велöдöмöн петöны зiль йöз. И СПК-лы бур отсöг. Кодi эськö налы отсалас? Уджтöмалысьясыд тай оз окотапырысь петны му вылад. Сэк жö и школа сьöмтор нажöвитыштö, и велöдчысьяслы чуктыштö. А картупель СПК-лöн воöма абу лёк. Позяс скöтöс вердны и бокö на инавны.

Парма гор
23.09.2008

Отредактировано Vladimir (25.09.2008 20:48:18)

КОДI ВОАС ПЕРВОЙÖН.

   Помöсдiн вожса йöз ёна виччысьöны сотöвöй связь, талун сiйö танi абу на.
   Танi "Мегафон" важöн нин сувтöдлiс вышка. Öнi тайö операторыс заводитiс уджавны Югыдъягын, сiдзкö, воас и Помöсдiнöдз. Прöстö, сылöн кытшын Помöсдiн артмö бöръяöн, та вöсна ковмас на виччысьыштны. Но öнi сиктö воис "МТС". Тайö операторыслы заводитiсны вöчны торъя башня улö подув. Кор помасяс став уджыс - некод жö стöча оз тöд. Но кодсюрöлöн тайö оператор вылас надея ыджыдджык. Помöсдiнсаяс кыкнан операторыслы радöсь, мед сöмын öдйöджык лöсьöдасны связь. Кöть кодыс.

Асланым корреспондентъяс.
Парма гор
25.09.2008

   - Коркö, гашкö, и миянлысь, Помöcдiн кустын олысьяслысь, сьöлöмнымöс шонтас морöс зептын вибрируйтысь сотöвöй телепон.

Отредактировано Vladimir (25.09.2008 21:39:14)

С.КАПЛИНЛÖН ДОНЪЯЛÖМ.

   Республикаын мунö «Донъясь аслад республикаöн» акция. Сiйöс веськöдöма чужан му дiнö муслун чужтöм вылö.
   Акциясö вылö донъялiсны Комиысь муниципалитетöн веськöдлысьяс. Чужан мулöн пиöн лыддьö асьсö Кулöмдiн районса юралысь Сергей Каплин. «Танi колис менам талунöдз олöмысь унджык воыс, - висьталiс сiйö. - Таысь öтдор, ме ёна радейта вöравны да кыйны чери, а Комиын та вылö эмöсь став позянлунъяс».
   С.Каплин серти, талун том йöз омöля тöдöны республикалöн кольöм туй, районлöн шедöдöмторъяс йылысь. «Найö «пöжсьöны» асланыс делöясын да этша мый тöдöны, мый вöчсьö на гöгöрын да кыдзи сöвмö район. Чайта, мый «Донъясь аслад республикаöн» кодь акцияяс ыззьöдасны йöзöс да нöшта öтчыд казьтыштасны сэтшöм ыджыд да мича му йылысь, кодi шусьö Коми Республикаöн», -лыддьö Эжва йывса юралысь.

Парма гор
21.08.2008

   - Кыськö бара нин выль кыв "кöвъялöмаöсь". Эм дона, донсьöдны, дон пуктыны, ... Эм и доналö, гöрд-дон (кöрт, бандзиб), ...
   Тайö кывсö вöчисны, ме чайта, тадзи: медводз вöлi: дон - цена, стоимость; сэсся содтыштiсны выль вежöртас роч ног: донаöй (менам) - дорогой (мой - "рубля-на-три"). Öнi сэсся тайö кывсис вöчисно нöшта и "донъясь". Ог тöд кыдзи "кыввöчысьяслы" - меным мисьтöмöн кажитчö. Пыр жö дум вылö усьö: пон - понъясь ("увтчи" - мись тöм кывъясöн).

КОДЛЫ ЭСКÖНЫ ЙÖЗ.

   Регыд кутам бöрйыны меставывса Сöветъясö депутатъясöс. Индам найöс, кодъясöс ёнджык тöдам, кодъяслы эскам. Помöсдiн овмöдчöминын лоас 10 депутат. Талун кежлö кандидатыс - 19 морт. Сiдзкö, сöмын 10 мортлöн ов да ним весьтö вермам пуктын пас. Став весьтас оз позь, сэк бюллетеньтö лыддясны туйтöмöн. Закон серти öти кандидатъясöс вöзйисны политическöй партияяс, а мöдъяс шыöдчисны ас кöсйöм серти. И тайö правильнö. Мортыс кö ачыс кöсйö лоны депутатöн, сiйöс падмöдны оз ков. Сiдз-кö, тöдöмöн да кутшöмкö могъясöн мунö...
   Помöсдiн вожса 19 кандидатыс - кодi найö? А.Н.Бородин (вöзйис КПРФ), О.Ю.Гаврикова (вöзйысис ачыс), З.Н. Демина ("Единая Россия"), М.Е.Демина("Единая Россия"), В.П.Зюзева ("Единая Россия"), Н.И. Игнатов (ачыс), Е.М.Игнатова ("Единая Россия"), Е.П.Курочкина (ачыс), Л.П.Пыстина (ачыс), А.И.Уляшев ("Единая Россия"), В.И. Уляшев (ачыс), Л.С. Уляшева ("Справедливая Россия"), Т.В.Уляшева (ачыс), А.И.Ужицкий ("Единая Россия"), Ю.А.Чисталев ("Единая Россия"), Г.И.Чисталева ("Единая Россия"), Н.С.Чувьюров (КПРФ), Н.Е.Шевелева ("Единая Россия") да М.А.Шомысов ("Единая Россия"). Аддзам, мый унджыкöн мунöны "единороссъяс". Нинöм чуймöданаыс абу. Странаын медвына, талун кежлö власьт кутысь партия. А миянлы сетöма право: вермам сетны гöлöс партия вöсна, а вермам - морт вöсна. Кызвын йöзыс бура нин тöдсаöсь. Унаöн водзын вöлiсны депутатъясöн. Мен жаль, мый Михаил Васильевич Курочкин öнiя составас оз баллотируйтчы. Сiйö зэв бура веськöдлiс овмöдчöминса Сöветöн. Гöгöрвоа: мудзис мортыс, колö шойччыштны. Но окота, мед кöть аслас опытöн водзö отсалас выльысь бöрйöм Сöветлы.
   Кутам бöрйысьны "öтувъя список" серти. Кыдз Помöсдiнын, сiдз и орчча сикт-грездъясын. А водзын быдлаын вöлi аслас округ, и кандидатъясöн мунiсны быдöнлы тöдсаджык йöз. Выльпöлöс системаыс неуна майшöдлыштö. Кöн унджык бöрйысьысь, сэн и "поводдясö" кутасны вöчны. Шуам, Помöсдiн вермас аслас гöлöсъясöн "пöдтыны" грездъясöс. Но вывтi майшасьны оз жö ков: кандидатъясыс векжö тöдса йöз. И мöдарö: кöсйöны кö збыльысь лоны депутатъясöн öнiя кандидатъяс, мед ветлöдлöны грездъясöд, тöдмасьöны йöзкöд, петкöдлöны асьнысö.
   Кутшöм депутатъяс -сэтшöм и власьт. Буретш налы ковмас ас костсьыныс бöрйыны администрацияöн веськöдлысьöс. Пыдди пуктана Сöвет - пыдди пуктана веськöдлысь.
   - Случайнöй йöз абуöсь, - шуис Помöсдiн сиктса администрацияысь юралысьöс вежысь Н.В.Игнатов. -Судитöмаяс абуöсь жö. Тöдса йöз. Окота, мед локтiсны делö вöсна висьысь, сикт-грездъяс вöсна тöждысьысь войтыр. Быдсяма вопросъяс ковмас решайтны. Пыдiсянь гöгöрвотöг найöс он видлав. Веськыда шуам: öнöдз ёнджыкасö уджалiс сöмын Сöветлöн президиум. Гоз-мöд морт. Кутам надейтчыны, мый водзö уджö босьтчас дзоньнас Сöветыс. Сэк ставлы бур лоö.
   Олöмыс петкöдлас. Медтöдчанаыс öнi -бöрйыны. Кывкутысь, ас му вöсна висьысь йöзöс. Унджыкыс -татшöм. Кыдз Помöсдiн вожын, сiдз и мукöдлаын. Ветлам, бöръйысям.

Александр ШЕБЫРЕВ.
Парма гор
30.09.2008

   "Помöсдiн овмöдчöминын лоас 10 депутат. Талун кежлö кандидатыс - 19 морт. Сiдзкö, сöмын 10 мортлöн ов да ним весьтö вермам пуктын пас".
   - Ме чайта, мый унджык йОзыс Помöсдiн кустын (да и мукöдлаын - республика пасьтала) "пуктасны пас" первойя дас кандидат весьтас (мед ёна не мырсины-думайтны). Алфавит серти кö, Уляшевъясыд (и мукöд коми йöзыд) быдлаын медбöръяяс лыдын лоöны - некод ёнасö оз и бöрйи.

ДЕПУТАТЪЯС КЫВКОРТАЛIСНЫ.

   "Парма гор" газетын тавося сентябр 25-öд лунся 118-öд номерын петалiс Кулöмдiн районса администрацияöн юралысь С.П.Каплин дорö помöсдiнсаяслöн шыöдчöм. Найö сувтöны асланыс керкаяс дорын бар стрöитöмлы паныд.
   Стрöйбасö кыпöдö Р.В. Микушев.
   Гижöд петöм бöрын чукöртчылiсны овмöдчöминлöн Сöветса депутатъяс. Корлiсны и Роман Васильевичöс. Вöлi сы дорö уна юалöм. Депутатъяс лэдзисны Р.В. Микушевлы стрöитны стрöйбасö. Но лоö оз бар, а кафе-нуръясянiн, мöд судтаас меститчас гостиница. Курыдторйöн кутасны вузасьны 10 час рытöдз. Кафе-столöвöяс торъя йöз кутасны видзöдны пöрадок бöрся.

Николай ЛЮТОЕВ.

Парма гор
09.10.2008

МИЯНЛЫ ТАНI ОВНЫ.

   Помöсдiнса депутатъяс примитiсны решение, код серти сетiсны вöля Р.В.Микушевлы водзö стрöитчыны босьтöм участок вылын. Кафеыс пö кутас уджавны 10 час рытöдз, сэнi лоö нöшта столöвöй да гостиница. Ме ог кут шуны сиктса став йöз вöсна, но матiгöгöрсаыс, кодъяс олöны "Луч-24" лавкакöд орччöн, унджыкыс прöтив выль стрöйбасö кыпöдöмлы. И со мыйла. Кыдзи и гижлiсны воддза шыöдчöмас, шум, кодалöм, лöп-ёг дышöдiсны нин. Власьт миянöс эскöдö, мый выль вöчанторйыс кутас уджавны 10 час рытöдз сöмын. А мыйла, сiдзкö, оз позь öнi лöсьöдны пöрадок "Луч-24" дорьщ, мед этшаджык вöлi восьса юöмыс? Öнiя власьт шуö: видлалiм пö войнас уджалöмсö дугöдöм йылысь вопрос, но прокуратура сувтiс паныд - оз пö позь суитчыны предпринимательяслöн уджö. Но öд сiдз жö лоö и Микушевкöд! Öнi быттьö стрöитö кафе, а кьшöдöм бöрас вежас профильсö да кутас уджавны, кор кöсъяс. Сiйöс сувтöдысь законыс абу.
   Меным торйöн нин тешкодь, мый шуöны: кутас пö уджавны дас час рытöдз, кор законын абу индöма, кутшöм предприятиелы кымын час суткинас уджавны. И тайö мойд улас депутатъяс примитöны решение восьтны кафе. Этша на миянлы "Луч-24"-ыд - лоас кык пöв "гажа". Либö миян сэсся бокынджык муыс абу? Мусö öд переоформитны абу сьöкыд - ачым судитчылi та кузя сельсöветкöд да тöда, мый йылысь сёрнита.
   В.В.Путин президенталiгöн и öнi пыр шулiс, мый вöчас ставсö, мед Россия лоис кажитчанаöн бизнеслы да комфортнöйöн олысьяслы. Гашкö, господа депутатъяс жалитiсны Микушевöс, мый сiйö видзис уна сьöм, а йöзлöн недовольствуйтчöм вылö öвтыштiсны кинаныс? Но, сiдзкö, эм мый йылысь мöвпыштны локтысь бöрйысьöмъяс водзвылын.

Николай ИГНАТОВ.
Помoсдiн.

Парма гор
09.10.2008

«ТI, ЗБЫЛЬЫСЬ, ГЕРОЙЯС!»

   Во комын сайын видз-му овмöсын уджалысьяслысь лун пасйигöн онiя райадминистрациялон актовой залыс пыр вöлi тыр. Тайö и гöгöрвоана: сэки Эжва йылын крепыда сулалiсны кок вылас квайт совхоз, "Вычегодскöй" госпромхоз, накöд йитчöм мукöд предприятие. Öнi серпасыс дзикöдз вежсис. Видз-му овмöcьяс да сэнi уджалысьяс ёна чинicны. Колян чукöртчылöм дырйи, октябр дасöд лунö, райадминистрациялöн актовöй залын комын сайö морт и пукаллic. Тайö вöлiны найö, кодъяслöн уджöн кутчысьö районын видз-му овмöс, кодъяс пуктоны тöдчана пай республика сöвмöдöмö.
   Видз-му овмос управлениеöн веськöдлысь И.С.Поповлöн сёрниын вайöдöм лыдпасъяс унаöс, тöдöмысь, шемöсмодiсны. 2008-öд вося январ öтиöд лун кежлö öтувъя крестьянскöй да ас овмосъясын лыддьыссис 3719 юр гырысь скöт (сы лыдын 2250 мöc), 759 порсь, 2601 ыж, 1136 кöза, 402 вов. Мöc лыд серти миян район республика пасьта босьтö Кöрткерöс район бöрын мöд места. 2007-öд воын Эжва йылын лысьтöма 6889 тонна йöв (республика пасьтаысь 10,2 процент), вöчöма 903 тонна яй (3,5 процент), быдтöма 5500 тонна картупель (2,2 процент) да 1967 тонна градвыв пуктас (7,7 процент). Яй кузя ми босьтам 4-öд, картупель кузя — 10-öд да градвыв пуктас кузя - 4-öд места. Видз-му овмöсын уджыс зэв сьöкыд, но йöзлысь зiльöмсö колана ногöн оз донъявны, удждоныс пыр на кольö зэв ичöтöн. Но та вылö видзöдтöг сиктса войтыр ловнаныc оз усьны, олöны аскиа лун вылö лачаöн.
   Помалöма уджъяс видзьяс да муяс вылын. Заптöма кöрым скöтлы, кöть и поводдя ёна жö падмöдiс тавося страднасö. Арыс козьналiс мöд няньлысь озыр урожай. 22,5 гектар вылын быдтöма 328 тонна картупель. Тайö быд гектар вылысь 146 центнерöн. "Помöсдiн" СПК-лöн лои гектар вылысь 188 центнер. Картупель идралöма ас кадö. Ёна отсасис Помöсдiн школа. Таысь ыджыд аттьö колö висьтавны школаса директор Ф.Э.Линдтлы, велбдысьяслы, велодчысьяслы да налöн бать-мамлы.
   А сьöкыдлуныc зэв уна. Асьныд думыштлöй. Эм cöмын 32 тракторист-машинист 55 трактор вылö. На пиын 30 арöсöдз cöмын куим механизатор. Татшöм жö серпас водительяс кузя. Помкаыс сыын, мый том войтырöс повзьöдö оз cöмын ичöт удждон, но и киcсьöм техника. Тракторъяс уджöдöма 96, кöрым заптан - 98 да му обработайтан техника -92 процент вылö. Кад найöc сдайтны корт ломö. Механизаторъяслöн кужысь кияcöн бара на öти сезон лои уджöдöма важмöм техникасö.
   "Помöсдiн" СПК-ын петкöдлöны пример М.В. да Р.А.Игнатовъяс, М.А. Попов, Д.А.Курочкин, И.В.Уляшев. "Пожöг" СПК-ын водзмбстчбны М.С.Уляшев, HA.Третьяков, И.Д.Уляшев. Бытьысь колж пасйыны "Помöсдiн" СПК-ысь сварщик Н.И.Ужицкийöс, кодi кадöн артасьтöг пыр дась локны отсöг вылö механизаторъяслы. Кужомöн котыртö удж тайö жö овмосын техникаöн веськодлысь И.В.Игнатова.
   Кольöм воын моз жö гырысь вермöмъяс шедöдöны "Помöсдiн" СПК-ысь Скородум отделениеса скот дорын уджа-лысьяс: бригадир О.В. Мингалёва, дояркаяс Н.В. Жангурова, A.M. Демина.
   Май тöлысьö "Рассвет" крестьянской овмöсын вöлi скот юр лыд паськöдысь операторъяс пöвстын 14-öд районной конкурс. Вермысьöн лоис "Кулöмдiнса СББЖ-ын" уджалысь Т.Н.Расова. Ciйö участвуйтic и республиканскöй конкурсын.
   Пожöгса, Помöсдiнса да Кулöмдiнса маслозаводъяс вöчисны йöлысь 174,8 тонна прöдукция, 33 тонна вый, 13,9 тонна сыр.
   Воысь-во унджыкпöлöc прöдукция вöчöны Помöсдiнса да Кулöмдiнса маслозаводъясысь мастеръяс Н.М.Карманова да Н.Н.Лопырева. Тайö предприятиеясыс пыр участвуйтöны районса да республикаса ярмаркаясын. Сёрнитны кö районса ярмарка кузя, то сiйö таво вылас нин вöлi сизимысь. Во помöдз лоö нöшта кык. Водзö мунö удж йöв да яй примитöм кузя. Йöв ньöбöны " Кулöмдiнса МТС" котыр, "Пожöг" да "Помöсдiн" СПК-яс, Р.А.Поповлöн крестьянскöй овмöс. Найö босьтöны 346,2 тонна йöв. Тайö кольöм воын серти 4 тоннаöн унджык. Яйсö ньöбöма 66,7 тонна, кольöм воын серти2 тоннаöн унджык.
   Агропромышленнöй комплексö пырö и Кулöмдiнса нянь пöжалан завод. Предприятиеыс содтö нянь пöжалöм. Ньöбис нянь пöжалан электрическöй пач, заводитiс вöчны видз-му овмöс рыноклы пыркадся уджаланiн.
   Содöны районын крестьянской овмöсъяс. Р.А.Попов заводитiс дзоньтавны Керчомъяын 200 мöc вылö карта.
   Помöсдiнын нянь пöжалан заводлöн стрöйбаын маслозавод вöчöм вылö 2009 воын лоö вичмöдöма республиканской бюджетысь 10 миллион шайт. Уджъясыс мунöны нин.
Уна ошкана кыв вичмис залын пукалысьяслы С.П.Каплинсянь. «Тi, збыльысь, геройяс!» - тадзи донъялiс Сергей Петрович видз-му овмöсын талунъя уджалысьяеöс. Сылöн сёрниысь тыдовтчис, мый районса юралысь сьöлöмнас висьö видз-му овмöс, сэнi уджалысьяс вöcна да эскö тайö юкöнлöн аскиалунас, кутö лача, мый государство отсöгöн сиктса йöзлöн олöмыс векжö бурмас.
   С.П.Каплин да И.С. Попов водзмöстчысь бур уджалысьяслы сетicны Россия Федерациялöн да Коми Республикалöн видз-му овмöс министерствояслысь, райадминистрациялысь Почёт грамотаяс да аттьöалана письмöяс.

Николай ЛЮТОЕВ.
Авторлöн снимокъяс вылын:
Помöсдiнса овмöсын зiльысь войтыр;
залын пукалысь этша.

Василий Борисович Уляшев кызь сайö во нин машина руль сайын. Бöръя 8 восö новлöдлö автоöусöн Помöсдiн шöр школаса челядьöс. Быд асыв вайö школаö Бадьёльйывса да Вöльдiнса челядьöс, а урокъяс бöрын нуö бöр. Талун быд автобусö пукталiсны безопасносьт ременьяс Тшöтш и Василий Борисовичлöн автобусö.
   - Воддза серти неуна сьöкыдджык лои,- шуö сiйö. - 60 километрысь öдйöджык он нин мун. Мукöддырйи машина ачыс кусö. Но ми гöгöрвоам вылiса индöдсö. Ставыс вöчсьö сы вöсна, мед челядькöд эз ло неминуча.

Гижöд да снимок
Александр ШЕБЫРЕВЛÖН.
Парма гор
30.10.08

- А мый сiйö власьтыд кутас мырсьыны йöз вöсна. Власьтыдлы ставыс тайö - пöсь ни кöдзыд! Пукалöны асланыс шоныд кабинетъясын - муссö оз зырт!
Власьтлöн уджыс абу "уджавны ас видз-му овмöс вöдитыськöд", "лöсьöдны условиеяс меставывса йöзлы", "дорйыны татчöс йöзлысь интересъяс",... Налöн уджыс - артавны, кымын йöзыс картупель пуктöмаöсь-босьтöмаöсь-вузалöмаöсь, мед бöрын ошйысьны - вот кутшöм урожай власьт отсöгöн быдмис-чукöрмис! вот кыдзи чиновникъяс сöвмодöны-кыпОдОны "личнöй подсобнöй козяйство"!

   Либö мöдтор: ена власьтдорсаяс тшöктöны видзны скöт. Чайтöны, бура кö, мый мöс улас кö ведратö пуктан - век нин чукöйöн йöлыд брольгысяс. Оз кöсйины гöгöрвоны, мый мöс дорад ёна унатор на колö, мед йöлыд вузавмöн чукöрмис. Мыйтта турун во гöгöртö вердны колö?  - Ставсö сiйöс дженьыдик гожöмын колö пуктыны? Мыйтта вын мунö? Мыйтта пöсь киссьö? Мыйтта кад кыскö турун пуктöмыс? Ассьыд уджтö, эскö, он нин ена артав, но öд колö на и вайны турунтö карта-сарайöдз! Вылысад тöвбыд кежлад нöбйöн он кыскав  - колö трактор-машина. А трактор-машинаыдлы - колö сьöм. И вель уналаö на тадзи сьöмыд мунö. Комбикормыд абу донтöм и! Гидыд öдйö важмö-сiсьмö - бара жö сьöмтöг оз кыпты выльыд.
   А мыйджык, эськö, медводз колö, мед уна йöв лысьтыны. Кутшöм медыджыд пронблемаыс кыптö?Правильнö! Медводз кыптö - "половой вопрос"! - Мöскыдлы колö öш. Абу кö öшкыд - оз ло ни яй (кытысь куканьыд öштöгыд лоö?), оз ло и йöлыд. Водзын быд сиктын вöлi совхознöй гидын некымын öшкöн, а öнi - кытысь корсян?
   Ме чайта, мый чиновник гöтырыслы кö друг "ковмас"..., а мöдыс оз и "дзигöдлы" - мöдысь тайö чина мортыдлы весиг  румка вина гöтырсыс оз лэпты! А кöсйöны найö, мед ведраясöн мöскыд лысьтыс...

А.И.УЖИЦКИЙ: ТАТЧÖ МОРТ ЛОКТÖ МОГÖН

   Неважöн ми бöрйим муниципалитетъясса Сöветъясö депутатъясöс. А найö ас костсьыс бöрйисны администрацияöн веськöдлысьясöс. Уналаын юралысьыс вежсис, а кöнсюрö колис важыс. Помöсдiнса администрацияöн юравны депутатъяс индiсны Алексей Иванович Ужицкийöс, кодi и водзын уджалiс тайö должносьт вылас. Сiдзкö, бöрйысьысь да депутатъяс мортыслы эскöны.
   Ми сёрнитам А.И.Ужицкийкöд талунъя делöяс йылысь.
   - Чолöмала выльысь бöрйöмöн, сиа бура уджавны. Кöть тайö уджас Тiянлы велöдчыны оз нин ков. Мый öнi майшöдлö администрацияса юралысьöс?
   - Унатор майшöдлö. Медпервой - сьöм тырмытöм. Сiйö, кыдз шуласны, век этша. Öнi, финансöвöй кризис вöсна, нöшта на ковмас топöдыштны вöньяс. А вöчны колö унатор. Шуам, Выльгорт дорын да Мöдлапöлын водопроводъяс, скважинаяс... Йöзыслы зэв деливö ватöг. Кутам öтув корсьны петан туй. Куш проект вöчöмыс, надейнö, 500 сюрс шайт кымын сувтас. А сэсся колö и олöмö пöртны проектсö. Надейтчам, мый республикаса да федеральнöй бюджет отсöгöн.
    Но меным öтиторйысь öбиднö. Унаысь сетöм сьöмыс мунö сынöдö. Гожöмбыд сикт благоустроитам, ноксям-вöчасям, а ар кежлö - бытьö Мамай мунöма. Видзöдлöй потшöсъяс вылö. Челядь вöчасисны, зiлисны, а öнi öбичатöм йöз ставсö жуглiсны! Быдмысь войтырлöн уджыс весьшöрö лоис. А ми сёрнитам культура йылысь... Быд во 100 тысяча шайт вештам уджтöмалысьяслы, кодъяс весалöны идöртöмъясöн кольöм лöп-ёг. А сöстöма кö олiм, тайö сьöмсö позис вуджöдны мöдлаö. Шуам, туй весалöм вылö... Асьным асьнымöс удзöдам. Кад нин вежсьыны. Талун олöмыс абу воддза кодь. Водзын сикт-сöвет вöлi корас предприятиеясысь юрнуöдысьясöс да шуас: тэ туй весалан сэтi, а тэ -мöдлатi. И весалöны. Талун тшöктыны он вермы. Сöмын корны...
   - Йöзыс юасьöны: кор лоас Помöсдiнын сотöвöй связь? Мыйла дугöдiс уджъяссö "Мегафон"? Быдсяма сёрниыс нин мунö: и вышкаыс пö пöлöс, и мукöдтор...
   -  Менсьым помтöг жö юасьöны. И сёрнияссö кыла. Но ме абу "Мегафонöн" юрнуöдысь, ог вермы на пыдди вочавидзны. Мен, кыдз Помöсдiнса олысьлы, сотöвöйыд зэв жö ёна колö. Кызь öтиöд нэмын олам, а звöнитчыны ог вермöй. Шуа сöмын сiйöс, мый ачым тöда. Звöнитлiсны "Мегафонсянь", юасисны кран да йöзлы оланiн. Öнi кöрт потшöсон кытшовтöдiсны вышка дорсö. Сiдзкö, уджыс водзö мунас. Колö гöгöрвоны: öти бригада лöсьöдö фундамент, мöд - кыпöдö вышка, коймöд - тэчö колана оборудование, нуöдö пуско-наладочнöй уджъяс. Коли сöмын бöръяыс. Кутам лача, мый связь регыд лоас. Ковмас помöсдiнсаяслы неуна виччысьлыны на. А стöч кад кузя... Шулi нин: ме "Мегафонöн" вылас абу ыджыд.
   -  Со "МТС" тшöтш жö вöчис фундамент аслас вышка улö "Верхняя Вычегда" ООО-лöн контора дорын. Кодсюрö шуöны: "Мегафонлöн" катласиг-костi "МТС" водзджык лöсьöдас связьсö. Мый та вылö шуанныд?
   -  Нинöм ог шу. "МТС"-сянь администрацияö эз на звöнитлыны, стöч планъяссö ог тöдöй. Вöчасны кö водзджык, - нöшта бур лоö. Кымын унджык оператор - сымын бурджык йöзлы.
   -  Кыдзи уджавсьö выль депутатъяскöд? И мый насянь виччысянныд?
   - Ставыс тöдса йöз, быдöн пыдди пуктана. Бöрйысьысь налы эскö. Öтитор вöзъя -мед дорйисны Помöсдiн вожса войтырлысь интересъяс. И öтув уджалiсны миянкöд. И нöшта: мед быд сессия вылö волiсны. Дисциплинатö колö ассяньыд кыпöдны.
   -  Унаöн оз тöдны, кыдз да мый уджалö сиктса администрация. Пöшти быдлаын сiдз. Мый татшöм йöзыслы вочавидзны ?
   - Администрацияö йöзыд ёнджыка локтöны асланыс тöжд-могöн, унаысь - шогöн да дойöн. Сöмын свадьба дырйи, кагаöс гижöдiгöн волöны радлунöн. Нöшта бюджетникъяс кыпыд лолöн пыравлöны босьтны удждон. Но быдлунъя уджсö миянлысь йöзыс оз тöдны. Шуасьöны на: мый сэн и вöчöны? Вочавидза сэтшöмъяслы: олöмыс быд здук чужтö выль могъяс, кодъяс йитчöмаöсь Помöсдiн овмöдчöминкöд. И быд татшöм мог вылын колö ёна уджавны.

Сёрнитiс Александр ШЕБЫРЕВ.

Парма гор
18.11.2008

Помöсдiнлöн гажыс бордъя
   Помöсдiнса культура керка да сэтчöс сьылысь-йöктысь котыръяс нимавлiсны водзтi и öнi абу бöрынöсь кыдзи районын, сiдзи и республикаын. 1980 восянь сыöн веськöдлö зэв кыпыд лола, восьса сьöлöма да мича нюма В.В.Соколюк. Кутшöм ачыс, сэтшöмöсь и уджалысьясыс: народнöй театрса режиссёр Н.Е.Шевелёва, кысян кружок нуöдысь Л.В.Уляшева, йöктан студияöн веськöдлысь В.В.Игнатова.
   - Эсканныд кöть онöй, а эг мöвпавлы уджавны культура юкöнын, - шуис Валентина Владимировна. - Кöсйи лоны агрономöн. Но лоис сiдз, мый помалi Сыктывкарса культпросвет училище, кодöс шулiм «кулёкöн». Локтi чужанiнö, мусаПомöсдiнö. Танi уджала 1980-öд восянь.
   Культура керка кодзув-коткар кодь. Быд лун кружокъяс, репетицияяс либö концертъяс. Локтöны пöрысь и том. Ветеранъяслöн «Сьöлöм сьылöм» хорын 19 морт. Зэв кыпалысь йöз. Медся олöмалы, Елена Васильевна Уляшевалы, регыд 80 арöс. Сiйö дыр уджалiс культура керкаöн веськöдлысьöн, овны сытöг оз вермы. Уналы 70 сайö. Сьылöны шуда и шог олöм йылысь коми сьыланкывъяс, вайöны йöзлы радлун.
   Ичöтъяскöд да томъяскöд 16 во нин уджалö «Вдохновение» йöктан студияöн веськöдлысь Валентина Васильевна Игнатова.
   Эм мый пасьтавны кыдзи сьылысьяслы, сiдзи и йöктысьяслы. Вурöны костюмъяс оз кöнкö бокын, а асланыс «Рукодельница» кружок вылын, кодöн веськöдлö сiйö жö В.В.Игнатова. Челядь уджалöны сьöлöмсянь, окотапырысь. Артмöны син радлана платтьöяс, дöрöмъяс да гачьяс. Аслыныс долыд и петкöдчысьяслы любö.
   Нималö народнöй театр, кодлысь 30 вося юбилей пасйисны 2007 воын. Веськöдлö Нина Евлогиевна Шевелёва.
   - Нина Евлогиевна спектакльястö пуктö зэв бура, -висьталiс Валентина Владимировна. - Сiйö пьесасö кылö сьöлöмнас, аддзö медся тöдчанаторсö. Видзöдан да, абу ворсöм, а олöм. Театрö вермö пырны быд окотитысь, мед сöмын вöлi ворсны кöсйöм.
   Ворсöмъяс пуктöны нималана гижысьяслöн пьесаяс серти. Медся ёна пьщци пуктöны Нёбдiнса Витторöс. Пуктöны и ас сиктса автор Александр Шебыревöс, кодлöн гижöдъяс серти спектакльяс ёна воöны сьöлöм выланыс йöзлы.
   Культура юкöнын водзмöстчöны велöдысьяс. «Радлун» котырын 10 морт. Кык во сайын локтiс уджавны культура керкаö Лидия Васильевна Уляшева. Лöсьöдiс «Гобелен» кружок, кöнi 25 морт. Велöдö челядьöс серпасасьны. Окотитöны зэв унаöн и оз сöмын нывъяс. Волывлöны весиг ыджыдджык классъясысь зонъяс. Котыртлöны выставкаяс. Лидия Васильевна отсöгöн томъяс вöчöны сэтшöм мича серпасъяс, мый он вермы вештыны синтö. Велöдчыны колö кык во, но унджыкыс медводдза вонас нин лöсьöдöны зэв мича серпасъяс.
   Районын мунö КВН. Сылы подув пуктылiсны буретш помöсдiнсаяс. Котырлöн нимыс вöлi «Чудьяс», сы вöсна мый Помöсдiн гöгöрын овмöдчылöмаöсь буретш тайö йöзыс. Вöлi районын медбур котырöн, но бырис, сы вöсна мый веськöдлысьыс -Елена Михайловна Игнатова - öтдортчис тайö уджсьыс, пырис велöдны школаö. Но эскöны, мый «Чудьяс» ловзясны.
   - Успенньö лунö сиктса администрациякöд öтвылысь нуöдам «Сиктлöн лун» праздник. Водзö вылö кутам нуöдны тайö лунас и ярмарка, мед вузасисны быдсяматорйöн ас сиктсаяс и районысь да республикаысь войтыр. Буретш тадзи вöлi водзтi, кор Помöсдiнö волывлiсны весиг Мылдiн районысь. Ме думысь, ярмарка да гаж öтувтас миянлысь войтырнымöс, сетас позянлун нажöвитчыштны и петкöдлыны сям, -водзö сёрнитiс культура керкаöн веськöдлысь.
   Эмöсь майшöгъяс. Оти-кö, абу автобус, нинöмöн ветлöдлыны концертъясöн да спектакльясöн. Мöд-кö, колö вужвыйöныс дзоньтавны культура керканысö. Валентина Владимировналöн висьталöм серти, вевт да йирк дзоньталöм вылö колö матö 2 миллион шайт. Тайö сьöмсö районлы колö аддзыны быть. Мöд ногыс Помöсдiнса культура керкаын сьылöм-йöктöм помасяс.

Алексей КОРЕЦКИЙ.
Парма гор
10.02.2009