ЭЖВА ЙЫВЛÖН ФЛАГМАН
Оз кö и вежсьыв-а. Сё во нин тöда, а век на важ кодьыс. Пöрысь да вöрысь. Тайö ме аслам ёрт Василий Николаевич Чувьюров йылысь, кодöс, гашкö, оз сöмын республикаын, но и мирын ёнджыкасö тöдöны Кузьнеч Васьöн. Интернетын сьыланкывъясыс бергалöны да, кыдз нö оз!
Ошйысьтöг оз вермы:
- Талун кежлö гижи 850 произведение!
Тадзи и шуö: «произведение», а оз «сьылан-кыв». А кыдз нö оз, öд сьылан-кывъяс кындзи, кыдзи шуö ачыс, гижö и ыджыд формаяс, весиг опера.
Ме некор ог шу сылы ошйысьысь чери кыйысьлы моз: «Чинтышт». Сы вöсна мый тöда: мортыс збыльысь гижö уна. Дерт, абу ставыс öткодь бур, но и сыысь, мый талун сьылöны сылысь да кутасны сьывны водзö, колö шуны мортыслы муöдз копыртчöмöн аттьö. Доныс абу сэтшöм сьыланкывъяслы, кыдзи «Пипилiстi сöкöлöй», «Август тöлысь», «Эжва вылын», «Кужба гöра», «Коми танго», «Вöрын ветлö ош», «Чолöм, чомöр!», «Кодлöн Паспомын?».
А кутшöм ыджыд бур сiйö вöчис Надежда Мирошиченколöн кывбуръяс вылö роч сьыланкывъяс гижöмöн. Сьылöны оз сöмын республикаын да Россияын, но и став мирын. Вöвлытöм ыджыд озырлун сетiс, и аслыс эськö озырмыны, миллионерöн лоны, да абу тай сiдз. Ми, комияс, ог кужöй дорйыны асьнымöс.
Пиньтöм вомнас шешъялö:
- Мен пенсия тырмö. Сэсся öд и «заслуженнöйысь» воö.
Быттьö сё сюрс «Коми АССР-ысь культураса заслуженнöй уджалысь» нимсьыс воö, кыкыс öд весиг абу. Татшöм сiйö и эм: некор абу пикö воöма, век вылын юра да нимкодь лола.
Ст вунöд пасйыны, весиг тöдчöда: сiйö öд медводз тöдiс колхоз да совхоз удж. Буретш сэки, кор Василий Николаевич вöлi стрöитчысьяслöн бригадирöн, кыпалiс вит скöт карта, кык пилорама, силос видзанiн, куим картупель видзанiн, культура керка, лавка. Сэки видзисны совхозлысь 760 юр сюра гырысь скöт, быд во сдайтлiсны 150-160 тонна яй. Ньöбисны 28 трактор да машина.
- Кызь во бригадиралi да öти шойччан лун эг тöдлы, отпускö сöмын кыкысь лэдзлiсны, - казьтылö кольöмасö Василий Николаевич. - Ачым кык пöвстöн уджалi и йöзлысь требуйтi. Дыпгьяс непöштö зорйöн, но и черöн уськöдчылiсны. А кутшöм нужда меным вöчтöм уджсö пасйыны?
Кузьнеч Вась вылад кыдзи кинад воан, сiдзи и лэбан. Куим-нёльöс öтпырйö вермас куснявны.
Миян рöдын пö «пув ваöн» мыссьысьяс да мышкöн мунысьяс эз вöвны.
Мыгöрнас и сьöлöмнас ыджыд морт и семьясö лöсьöдiс ыджыдöс. Гöтырыскöд быдтiсны да сувтöдiсны кок йылö квайтöс. Ставныслöн асланыс семья, бать-мам кодьыс жö зiльöсь, но гöвбöч гуысь да кысь да Василий Николаевич мыйкö да век лэптö бöр мунiганыс. Сылöн ставыс зэв мича воö ыджыд град йöрас.
Сьöд уджтö ыджыда бергöдысьыд да семьятö бура кутысьыд уна, а эз кö быттьö вöв Василий Николаевич Чувьюров кыдзи композитор да коми сьыланнога культура вылын кутысь, эськö коми йöз вöлiны ёна гöльöсь. Кыдзи ме чайта, мортлöн подулын - культура, абу кö сiйö - и мортыс абу. Кузьнеч Вась Эжва йывса культуралöн медыджыд чуркъясысь öти. Ачыс коркö шулiс, мый флагман. Мед и лоö тадзи.
Парма гор
27.02.2010