ДЗУЛЬЙÖН ТЫРÖМ МУСЛУН
Тайö вöсньыдик коска небöгыс дзулькйöн тырöма муслунöн да мам йöв кöра аслыссяма шоныдöн, кодi öвтыштö быд лист бок бергöдöм бöрын. Да и кыдзи нö мöднöгыс позьö шуны сiйö му йывсьыс, кöнi тэ чужин, быдмин—cöвмин да суныштiн гыа олöмас.
Миян войвыв муыс оз лышкыдась ярюгыд шондiöн да кузь жар гожöмъясöн, но та пуд сiйö козьналас тэныд медмича тувсовъя дзоридзьяссö, кодъяс вермасны сывдыны медкын сьöлöмъяс асланыс садьтö воштан чöскыд кöрнас.
Тувсовъя ытваыс пальöдас кузь тöв бöрын вугралысь вежöртö, гажöдас синтö помтöм—дортöм отыс. Нимкодясьыштан пидзöсöдзыс ва пиö келöм еджыд кока кыдзьясöн, кодъяс пожъялöны вöсни кокъяссö ышмысь ваас. Чукöрöн пырöмаöсь йиа ваас и ловпуяс. Копыртчöмöн рöмпöштанö моз видзöдчöны, нимкодясьöны челядь моз голяас öшлöм сикöтш — кольяснас.
Рытъя кыаöн гудыртöм ойымас ластавывса видзьяс вылын шпольöдчöны—герчкöны уткаяс. Садь быртöдзныс, буракö, гажныс бырöма чужан мусьыс, сiйöс кытшалысь вöр—васьыс. Окота горöдны, сьывны мыйкö гораöс, гажаöс, лов кыпöданаöс. Вот и веськöдыштан горштö тувсовъя лов сетан зараванас. Сiйö нöшта на öддзöдас кыпалöм ловтö мыйкö ыджыдтор вылö и бур вылö.
Эг и тöдлöй, турун пуктан кад воöма. Гöгöр ставыс пуритö—быдмö—сöвмö—кисьмö. Том и пöрысь, верстьö и челядь — кодi вермö киас кутны куран—коса — страдуйтö. Лун и вой синсьыс би петмöн заптö кузь тöв кежлö гортса пемöслы чöскыд кöра кос турун. Сэк костi медся ичöтъясыс наберушкаясöн котралöны вöрö, медым керöс бокъясысь öктыштны, юммöдыштны алöй вом доръяснысö турун пиö дзебсьыштöм озйöн да сыысь на юмовджык эрдвывса сьöлаозйöн.
А зiль да ун тöдтöм чери кыйысьяс номсöдлöны нин тэнö сьöлöм горувтö мыськыштысь сир чериняньöн да нöк пиын пражитöм зарни бокъясса гыч черинас. Медся шуда да везитысь ордас тяпкöдыштан вом доръяснад сола нельма да ком яй пелялигöн, кодъяс вежтö петкöдлöны пызан вылын руалысь кыз бокъяса самовар дiнын.
Арланьö неровтчöм гожся асыв. Здук кежлö и сутшкысьлic—ойбыртлic вöртасас доналöм шондiыс. Тэрмасьöмöн сыныштiс вор—ва вылö плавгысьöм зарни пратьяса юрсисö. И со бара нин сявкнитic асъядор енэжас быдсямa рöмъяснас. Тэрмасьтöг пуксьö выль лун. Лов шытö топöдöмöн вöйтчывлам дзользысь лэбачьяс шыас, а сэсся тэрмасьтöг кöтöдам—мыськыштам кöмтöм кокъястö синва кодь сöстöм лысва пиас. Асъя кöдзыдыс гильöдыштас унзiль вейястö. Вежöрыд и кокъясыд асьныс нуöны водзö кыркöтш дорын сёльöдчысь ичöтик ключ дорö. Сöдз тырнад чукöртан и чурснитыштан пинь чеган кöдзыд васö и суныштан мöc вöра йöв кодь ру пиас, кодi гöвкъялö — шебралбма Эжва бердса видзьяссö и увтасiнъяссö. Сьöлöмыд бордö и сьылö лöcьыдсьыс и любöысла. Кысь но сэсся татшöм мусö аддзан?!...
А тонö потшöc бердад ар нин кышöдчö. Гырысь зэръясысь киcсьытöдз котралан нюр вылö виж юра мырпомла. Юрвежöрыд бергöдчывлö, кор кывнад лямöдан чуньлыс гырся коддзöдан вотöстö. А важ керöс бокъясын да косьмыштöм вутшка нюр пöлöнысь вöзйысьöны наберушкаад чöд—чöдлач. Сяргысьöмаöсь, нюммунöмаöсь пöрöма яг нöрысъясын певпом гырся пув розъяс. Сöмын эн дышöдчы, öкты пестерад, тöвбыд красуйтчан. А мый дон сулалö чöcкыд кöра еджыд яя сьöла шыдыс! 3iль кöзяйкалöн енув пельöсса пызан вылын руалö нин вöcни коръяса сöмын на босьтöм выль картупель, а орччöн пу бекарысь ошöдчöмаöсь джынвыйö сола ельдöгъяс. Вежтö петкöдöны, сiдзи и окота гурчкыны—курччыштны еджыд яя бокъяссö.
Эг на удитöй пöтмöн нимкодясьны шоныд лунъяснас, а трачкöдчан веж кöдзыдъяс нин воисны, шебралiсны—вевттисны ставcö еджыд гöна эшкынöн.
Но та вылö видзöдтöг коз пу вылын коль чукöрас кылöны гажа гöлöсъяс — тайö уркайяс чивзöны—сьылöны, медся кöдзыд дырйиыc думыштöмаöсь быдтысьны. Да и жоньяслы, буракö, абу гажтбм: шутьлялöны—жбыръялöны кос турун сiяс пöвcтын, кокалöны—öктöны кольöм кöйдысъяс. Со и Эжва пыдöсын налимъяс палялöмаöсь гожcя унзiльысь, пöк лэдзöны—гартöны, выль олöм ва пыдöсын паськöдöны. А чери кыйысь тшак оз cёй! Ветелясьöма и номсöдлö муса котырсö чöcкыд налим юкваöн. Налим мускыд жаритöмöн вомад сылö, кывтö ньылыштны верман. Збыль! А медбур шойччанiныс коми мортлы тöв шöрад — пöcь пывcян. Койыштан доналöм гор вылад корöсь небзьöдан ватö да вирыд пузьывлö жарсьыс, став лысьöмыд небзьö. Куйлан, лигышмöма гöгöр любöыдла, а небыд чунь помъяса жарыс чепöльтыштлас то бöтилатi, то мöдлатi, вöтлö пысасьöм прöстуда висьöмъяс. Ок и лöcьыд! А кор швачнитан мышъястö пушкыртчöм пöcь корöсьöн, чипöcтлан и ойкнитлан. Кымын ёнджыка швачкан — сöмын нöшта на окота водзö шенасьны кыдз пу корöсьнад.
Вот тайö мичлун, лов кыпöдан гажлун, вын да эбöc сетан вöр—ваыcлы, чужан муыслы улöдз копыр. Сэтчöдз кутас овны коми морт, кытчöдз став тайö сьöлöм вöрзьöданаыc кутас кытшавны сiйöc.
ОВ ДА ДЗОРИДЗАВ КОМИ МУ, МИЯН КУЛÖМДIН РАЙОН!
