Вöлöгдаса архивлöн пасйöдъяс вылö мыджсьöмöн, "Где ты живёшь" книга лöсьöдысь И.Л.Жеребцов гижö, мый Бадьёльйыв чужис 1782 воын, но миян дорысь мунлöм нин тайö сиктса олысь Е.Е.Уляшёв аслас казьтылöмъясын гижö тадзи: "Мый Бадьёль пöлöн йöз овлöмаöсь ёна важöнджык, висьталöны татчöс местаяслöн нимъяс. Пример вылö, улыс ыб сайöд мунысь туй шусьö чудь туйöн. А чудьяс — зэв важ йöз. Ена важсяджык кад вылö индö и Уляшёвъяслöн ордпу. Лыддьöдла ассьым вожöс: Oврам Епим Конö Семен Трöпим Митипер Вась Петыр Ёгор Евгень. Оврамсяньыс босьтöмöн, ме — дасöд тшупöд. Шöркодя кö олiсны 40 воöн, то артмö нин нёль нэм. Вöльдiнса Oврам и локтiс татчö да ректiс медводдзаöн тыла. Сэсся матыстчис Епö. Налöн вужйыс и паськалiс да ловъя талун абу сöмын Бадьёльйылын, но и Эжва йылын, районын, республикаын да Россияын".
И сiдз, Бадьёльйыв — зэв нин важся коми сикт. Дженьыдика тöдмöдам сылöн талунöдз олöм-вылöмöн кыдзи сiйö жö и И.Л.Жеребцовлöн, сiдзи и Е.Е.Уляшёвлöн, учёнöй С.И.Сергельлöн, районлысь история гижысь М.К.Игнатовлöн да мукöд йöзлöн казьтылöмъяс да пасйöдъяс серти.
1853 воын 28 овмöсын вöлi 177 олысь, 1926 воын (НЭП дырйи) — 129 овмöс, 640 морт, видзисны 245 мöс, 390 ыж, 120 вöв.
Парма гор (Голос пармы) http://www.komipress.ru/smi/issues.php?id=5