ЭМ-Ö СЫКТЫВКАРЫН КОМИ РУЫС?
Сыктывкарса коми войтыр тавося чукöртчылöм дырйиыс сёрнитiсны сы йылысь, эм-ö юркарын коми руыс. Тайö нöшта на тöдчанаöн лоис бöръя воясö, öд Сыктывкарöс финн-йöгра войтыр костын йитöдъяс ёнмöдöмын шуöны медся водзмöстчысьöн, да татчö волысь рöдвуж войтыр видзöдöны, эмöсь-ö танi уличаяс вылын коми гижöдъяс, юргö-ö коми кыв, дженьыда кö, тыдалö-ö, мый найö воисны коми йöзлöн юркарö.
Аслас сёрниын коми войтырлöн Сыктывкарса представительствоöн веськöдлысь Мария Кузьбожева пасйис, мый конференциялы видлавны вöзйöма дыр кадся уджлысь кывкöртöдьяссö. Котырсаяс абу нин öтчыдысь шыöдчылöмаöсь та кузя карса веськöдлысьяс дорö.
- Ми радöсь, мый Мичурин нима паркын шуöма тэрйöдны национальнокультурнöй автономияяслы му, мед найö вермисны кыпöдны сэнi сiдз шусяна «национальнöй грезд», - висьталiс Мария Вячеславсвна. - А коми этношöрин йылысь, кöнi эськö быд районысь петöм коми йöз кыпöдiсны ассьыныс керка, этша сёрнитöны. Сыктывкарлöн выль генплан серти Гöрд гöраын кыпöдасны выль керкаяс, сiйö, позьö шуны, лоас кар шöрöн, и сэнi жö урчитöма торйöдны этношöрин-музей улö му.
- Быд сикас кывья мортлöн эм право овны ас войтырлы лöсялана оланiнын. Миян юркарын татшöмыс абу, - шызьöдiс чукöртчöмаöс Наталья Макарова. - Кодi кывкутö Сыктывкарлöн аслыспöлöслун вöсна: карса веськöдлысьяс да юрнуöдысь архитектор либö стрöитчан организацияяс? Тайö юалöм вылас вочакывсö ме эг куж аддзыны, но чайта, ми кö танi олам, ставыс тайö и миян сайын.
Конференция кежлö Наталья Дмитриевна дасьтöма мультимедийнöй презентация да снимокьяс отсöгöн петкöдлiс, мыйöн да бур либö омöль боксянь торьялö Сыктывкарным, доньялöма и юркарлысь да мукöд республикаса шöркарьяслысь öтуввезйын лист бокьяссö. И быдöн вермис аддзыны: Сыктывкарлöн сайтыс куим рöма флагысь да гербысь кындзи этша мыйöн торьялö Россияса карьяслöн лист бокьясысь. Казьтыштiс Наталья Дмитриевна и Сыктывкарса вина вöчан завод йылысь. Карса гöсьтьяс козин пыдди тшöкыда нулiсны сьöрсьыс «Олöм вын» бальзам. Но заводас нимсö рочöдöмаöсь, коминас öдва тыдавмöн сöмын пасйыштöмаöсь. Коми вужвойтыр аньяс пö шыöдчылöмаöсь та кузя заводса веськöдлысьяс дорö, да сэсянь вочавидзöмаöсь, мый найö вöчöны войвывса вотöс-быдмöгьяса юанторьяс, заводитöмаöсь лэдзны и Комилысь культурасö петкöдлысь «Достояние республики» водка.
Код сöмын тöдö-а, мыйын жö тайö водкаас петкöдчö коми культуралöн аслыспöлöслуныс...
Сыктывкарö тшöкыда волывлöны финн-йöгра войтыр. Сiдз, локтан воö танi нуöдасны рöдвуж войтырлысь гожся да тöвся спартакиадаяс, мунас и Россия да Финляндия костын культурнöй форум. И колö, мед карлöн вöлi аслас чужöмбан. Республикаысь национальнöи политикаса министр Валерий Коробов пасйис, мый миян карын кыкысь нин чукöртчылiсны финн-йöгра скульпторьяс, но наöн вöчöмторьяссö позьö аддзыны сöмын Национальнöй галереялöн йöрын. А позьö öд и карса уличьяс вылö сувтöдны скульптураяссö.
- Карнымлы коми русö содтöм могысь колö ышöдны и том йöзöс, университетын, искусство колледжын да гимназияын велöдчысьясöс, - висьтапiс Валерий Иванович. - Налöн эмöсь бур вöзйöмьяс.
Сёрнитысьяскöд öти кывйö воис и республикаса Юралысьöс вежысь Иван Поздеев, бöрья кадö пö ветлывлi Уфаö, Казаньö, Йошкар-Олаö, и, збыльысь, Сыктывкарын дорысь сэтчöс войтырлöн руыс быдлаын тыдалö ясыдджыка. Конференциялöн шуöмьяс серти представительстволысь да карса администрациялысь индöдсö пö öтув дасьтам, медым тыдалiс: Сыктывкар - Коми мулöн юркар.
Коми войтырлöн быд вося конференцияяс таво ар вöлiны нин Мылдiнын да Кöрткерöсын, кöнi сёрнитiсны вöр-ва видзöм йылысь. «Коми войтыр» öтмунöм исполкомöн вынсьöдöм график серти ноябрь 14 лунö сиктъяс сöвмöдöм йылысь сёрнитны чукöртчыласны Сыктыв районса коми йöз, а Емдiнын видлаласны меставывса асвеськöдлöмын мытшöдъяс. Эжваса комияс ноябрь 18 лунö сёрнитасны общественнöй котыръяс да власьт костын йитöдъяс йылысь. Ноябрь 19 лунö Койгортын сёрнитасны видз-му овмöс сöвмöдöм йылысь, а Удораын - районлöн аскиа лун йылысь. Сосногорскын ноябрь 21 лунö конференция вылас видлаласны карбердса сиктъяслысь олöмсö. Татшöм жö шöр сёрнитанторйыс лоас и Интаын, кöнi конференцияыс чукöртчылас ноябрь 26 лунö. Княжпогост районын коми кыв видзöм да сöвмöдöм йылысь сёрнитасны ноябрь 25 лунö. Сэки жö Усинскса коми войтыр индасны асланыс уджын локтан во кежлö шöр туйвизьяс. Сыктывдiнын йöзöс велöдöм йылысь сёрнитасны ноябрь 27 лунö. Тайö жö лунас Вуктылын кыпöдасны экологическöй туризм сöвмöдöм йылысь сёрни. Удж, дзоньвидзалун да оланiн йылысь мöвпъясöн юксясны ноябрь 28 лунö Кулöмдiнын. Декабрь 5 лунö Печораын видлаласны меставывса асвеськöдлöмын вежсьöмъяс кузя юалöмъяс да видзöдласны, кыдзи найö пöртсьöны олöмö. Чилимдiнын декабрь 10 лунö сёрнитасны том да олöма йöз костын öтамöдсö гöгöрвоöм йылысь. Коми войтырлöн IX съездлöн да воддза воясся конференцияяслысь шуöмъяссö збыльмöдöм йылысь сёрнитасны ноябрь 21 лунö Луздорын, ноябрь 29 лунö - Ухтаын, декабрь 9 лунö - Изьваын да декабрь 13 лунö - Воркутаын.
Коми му
06.11.2008
"Карса гöсьтьяс козин пыдди тшöкыда нулiсны сьöрсьыс «Олöм вын» бальзам. Но заводас нимсö рочöдöмаöсь, коминас öдва тыдавмöн сöмын пасйыштöмаöсь. Коми вужвойтыр аньяс пö шыöдчылöмаöсь та кузя заводса веськöдлысьяс дорö, да сэсянь вочавидзöмаöсь, мый найö вöчöны войвывса вотöс-быдмöгьяса юанторьяс, заводитöмаöсь лэдзны и Комилысь культурасö петкöдлысь «Достояние республики» водка."
- Да. Водка юöм бöрад и тыдовччывлö став культураыд. Но мыйла куш - "Комилысь культурасö"? Рочъяс унджык лэптöны? Омöльджыка бызгöны, карапужитчöны?
"Сыктывкарö тшöкыда волывлöны финн-йöгра войтыр. И колö, мед карлöн вöлi аслас чужöмбан."
- Финн-йöгра вöсна, сiдзкö, мырсьöны. А сиктса коми мортыд карад локтас да сiлы оз ков тöдны? - кöн сiйö и кодарö мунны колö? Оз ков сiлы мичлуныс? Сiдзкö, абу коми йöзлы тайö став "баннеръясыс", памятникъясыс, ...?
Ме век шулi, мый ставыс татшöмыс (и "выль кывъясыд") - "на экспорт". Абу коми йöзлы. Абу сиктса йöзлы.
