Уляшев Борис Васильевич (Вась Петыр Oнисьoм Вась Борис)
Мед гoгoрвоны и стoча донъявны талунъя олoмсo колo тoдны кольoм кадъяссo (историясo) аслад чужан мулысь.
Опонь Марин Мамлoн, Кирo Oгаш пoчлoн, рoдвужлoн казьтывлoмясысь пасйoдъяс
Бoръя лунъясo вoрыс тoдчымoн вежсис, бытьo кодкo пальoдiс кузь тoвбыдся кoдзыд унзiлысь. Лыска пуяс лоины вежджыкoсь, тoлыс кисьтiс – гылoдiс лымсo на вылысь; пучеръяс гoгoрын гoпторъяс артмисны, сир кoраджык лои сынoдыс. Тoдчымoн кузьджыкoсь лоины лунъясыс.
Быд ловъя лов радлo шондiлы. Пыстаяс сильзьoны шор пoлoнса том кыдзъяс вылын. Cизь тотшкoдчo кылo, выль сёян места вoчo кондаo кольяс кильины. Рам кеняяс тивзoны, лэбалoны пуысь пуo, сёян жo корсьoны. Уръяслoн сёймoсъяс эмoсь жo, вель уна чукoрмoма пуяс улын кильoм кольясыс. Вoль туй пoлoныс кoч кок туйяс вель уна жo, турун додьясысь гылалыштoмсo oктoны войнас. Тoв шoрнас байдoгъяс вердчисны шорпoлoнас, бадь кустъяс гoгoрсo ёна тапкoдлiсны табъя кокъяснас. Асьныс лым кодь жo еджыдoсь да он на и казяв оз кo вoрзьoдчыны. Лэбзигас бытьo серoктoны, эльтчoны: он на пo кут миянoс, ми oд бордаoсь. Oнi найoс он нин казявлы, мукoдлаысь сёянсo корсьoны. Пoткаяслoн коян кад матыстмo, чукoртчoны нин, дерт, асланыс радейтана местаясo, паськыд эрдъяс да нюръяс дорo. Тырмo, майбыр, местаыс айяслы тшапитчыны тышкасьны – пуркйысьны. Петкoлoны асьнысo пуяс вылын пукалысь эньяс водзын – вот пo ми кутшoмoсь. Бордъяснысo паськoдoмаoсь, йывъясыс инмoны чарoмас, бoжъяссo шевгoдoмаoсь, синкымыс гoрд. Оз вунoдчыны и сьылыштны йoктыгас, быдoн ас ногыс – чукчияс и сьoд таръяс – сьылoны свадебнoй сьыланкывсo.
- Вoр-ваыс тай, слабог, озыр на звер-пoтканас и черинас. Кыйысьясыс лёка этша колины. – Ышловзьo Кирo Oгаш, конда тыра додь бoрся восьлалыгмоз. – Некымын старик арнад кыйсьылoны лэч пекляясoн да чoскoн, пищальнад оз нин вермыны пoрысь синъяснад, пуля-порокыд абу и. Верстьo мужикяс война вылынoсь.
- Мыдзин, пoрысьoй? – Шыoдчo Oгаш вoлыс дорo. – Лолышт инo, сэсся oд бара чой паныд заводитчo. Час ме тэныд турунсo oктышта водзысис.
Вoлoс вердыштoм бoрын Oгаш видлo супень кoвсo абу-o личалoма, видзoдлo заветкаяссo. Найo тай абу воддза моз льoмпуысь, снасьт пратьысь ковмис вoчны. Сiйo зэв ён, пуръяс домалан гезйысь. Oнисьoм нырагезтo сыысь гартлывлo гынкoмястo дoмлыны.
- Но-о, вoрзьывлам жo, абу нин ылын сиктoдзыс. - Чурк вылад стрoитчывлoмаoсь да гортад локтiгад быд боксянь чойпаныд. – Кoчана, тэ-меа эськo абу жo нин уджалысьяс да лоo на тай, рушкутo тувйo он oшoд (кoчана кывйыс Oгашлoн ёрччoм пыдди).
Дзуртo тувсовъя лымйыс конда тыра додьлoн сювъяс улын. Oгашлoн син водзас аслас чужан сиктыс - Лымваыс. Зэв томoн на эновтiс бать-мам керкасo, рoдвужсo, ныв ёртъяссo.
Локтiсны корасьны Бадьёльйывсянь. Oгаш сэк первойысь на аддзис Петыр Oнисьoмoс. Тешкодь. Жoник да невеста первой на аддзoны oта-мoдсo, батьясыскo тoдсаoсь и.
Кыйсьысьяс унаысь ывдылoны асланыс угoдьoясысь тулан или йoра кыйигoн. Веськалoны кo пемдiгас вoр керка дорo бур на, абу нодя дорын узьoмыд. Кoзяиныс, кoть дзик тoдтoм, примитас, вердас и шоныд керкаын узьтoдас. Асывнас туйад петны сёйан сетас, ковмас кo пуля-пороктo вичмoдыштас. Тадзи тoдмасясны и другасясны. Миян айяслoн пoльясыс нин гашкo тoдсаoсь вoлiны.
Кык сикт костыс верст 40 кымын, прамoй туй некор абу вoвлoма. Ветлывлoмаoсь векньыдик ордымкoд визирка да лэч туйяс паськoдыштoмoн. Бадьёльйылo Oгашoс лякыд лымйoн вoла додьoн (рoзвальoн) вайлiсны-а.
- Слабог, воим жo тай сиктoдз, oнi сэсся додьтo кыскыны кокньыдджык нин лоo, кузь чойпаныдыс помасис жo. – Шуалo вoлыслы Oгаш. – Вердыштасны да войнас шойччан да аски бара удж вылo.
Айка-инька дорад, дерт, абу бать-мам дiнын кодь овнысo. Велалан жo тай дырoн. Сэсся челядь-кагаяс чужны кутасны oти бoрся.
Кымынкo узьтoм вой и кольo жo быдтысьыгад: кагалы пинь петo – биалoма, то мыт босьтoма. Биа висьoмoн кулавлiсны.
Слаб кагаясыд дыр оз вермыны кокнад ветлыны. Висьтавлoны кагаыслы пo нёльoд арoс нин, бура нин кужo сёрнитны, весиг рочыштoмoн: гуляй-гуляй эськo да кокыд абу. Сылы oд окота жo ывлаас петавны ворсысь челядь дорас.
Oгашлoн сэтшoм седунъясыс эз вoвны. Арoс тыригoн кокoн ветлыны заводитлiсны.
- Кагаыдлoн кокясыс кo слабoсь, нидзув выйoн колo бурдoдны. – Велoдлiс мамыс Oгашoс. – Зэв эськo лёк клящoй сiсь дука лекарствоыс, но колo на терпитны, аслад oд дитяыс.
Квайт ныла-пиаoс быдтiсны Петыр Oнисьoм гозъя. Ставныс дзувкoсoсь, горт улад дзолясянь отсасисны. Пес-ва пыртoм налoн удж, скoт дорад и. Кага видзoм да мукoд гортса уджясыс, дерт, Паладьлы унджык сюрлi. Детинаяс эз oтдортчыны вермана уджысь, медся любo вoвясыд, торъя нин Иванлы. Гoра-кoдза кадo сiйo быд асыв лудысь вайo: дом поводo кутчысьoма да вoв водзвылас восьлалo быттьo ина морт. Oтчыд Oгаш казялiс писo вoв вылысь (7-oд арoс кымын).
- Oнисьoм, пиыд со верзьoмoн ветлыны нин кужo, сoвны кыдзкo вермoма и.
- Потшoс вывсянь кoнкo сoлiс. – Шуo Oнисьoм и петiс пиыс дорo. – Кодiнo отсалiс вoв вылад сoвны?
- Некод эз, ачым сoлi. – Шуo пиыс.
- Кыдзи нo сoлiн, потшoс вывсянь?
Иван пуктiс муас няньтор - вoв копыртчис няньла, детина сувтiс вoв сьылi весьтo – вoлыд лэптыштiс юрсo и детинаыд вoв мыш вылын лои, бергoдчис и лючки пуксис. Аслас вомыс оз топав радысла, абу нин первойысь сoвлoма вoв вылад. Вoлыс рам вoлi и зэв радейтiс няньтo, ачыс локтo детина дорад. Иван сoлас и верзьoмoн локтo, чеччo сиктo вотoдз, эрд вылас петтoдз, мед бать-мамыс оз аддзывны. Гашкo полiс бать-мамлысь юавтoгыс сoвнысo. Батьыс нюмъялo, кызoктыштo.
- Бур, - шуo сiйo, - домав вoвтo, пыр да сёйышт. Талун ветлам агсасьны велoдчыны, кывзысьo тай вoлыс тэнo.
Опонь вoлi рымасьoджык велoдчыны, ёна радейтлiс лыдысьны. Oтчыд Oгаш локтас удж вылысь. Пиыс куйлo крoватьын паськoмнас, книгаыс усьoма кисьыс, книга тыра дoра сумкаыс oшалo крoвать бокын, а сумка волысыс голяас пысалoма.
- Опонь! О, господьoй, кулoма детинаoй! – Oгаш бoрддзис, оз слoймы мездыны сумка волыссo пиыс голяысь.
- Мый лои, мамук? Мыйла бoрдан? – Шыoдчис пиыс синъяссo тiлигмоз.
- Повзьoдiн oд тэ мэнo … зэв ёна … дона пиoй … сё зoлoта … кулoмoн oд нин чайтi. – Бoрдo Oгаш, некыдз оз вермы бурасьны. – Сумкаыд усьoма … кoвйыс зэлалoма … голяад волыс туйыс на тoдчo, со гoрдoдoма … Дырджык кo эг лок … гашкo эг нин и су ловйoн.
Вичмылыс и пиянлы кага видзoмыд. Рытъядорыс быри йoлыд. Кага бoрдo. А мыйoн вердан сiйoс? Мам кор на локтас удж вылысь. Детина (?)* пасьталас мамыслысь сёдчан кoлуйсo, босьтас пoдoнча и петас гидo. Идрасьo: тoлo-тoлo, эн педз, аддзан oд – ме Кирo Oгашыд. Кагатo вердмoныд вермас жo идравнытo.
* Колo тoдмавны идрасьысьлысь нимсo, кодi, дыр-o велoдчис школаын и с.в.
Бать-мамыдлoн кoть кымын челядь – ставыс аслад. Шуласны тай: кутшoм чунь доймас – сiйo и ёнтo.
Челядь быдмыштiсны, прамoя нин отсасьoны. Видз вылo мунам артельoн. А туруныс абу на тыр бура косьмoма. Oтияс вoр бокысь, кустъяс пoлoнысь куртoны и петкoдлoны турунсo вуджoр сайысь, мукoдыс разoдoны и бергoдлoны турун пластъяссo мед ёнджыка косьмас. Он oд ульнас курт турунсo тшыкoдны. Батьныс пинь-пыкoд лoсьoдo чoвтыг кежo. А челядьлoн туруныд вoрoшитoма лои, косьмыг костас позьo шойччыштны. Кустъясысь гoрд сэтoр сёйыштасны – горш косьмoмсo веськoдасны, вoр пoлoнысь оз корсялoны – чoсмасьoны, котралoны, ворсoны.
- Мыйся челядь Петыр Oнисьoм гозъялoн? Лунтыр котралoны да купайтчoны. – Шензьoны орчча видз вылын уджалысьяс. – Мый и видзoдoны бать-мамыс?
Туруныд косьмас да челядьыдлы оз ков унаысь тшoктoм, oдйo и шаркoдасны-куртасны. Лёдз-мoд юравтoм на, а Петыр Oнисьoм чoвтo нин.дерт делoджык топавтoм турунтo лэптавны, но онoд эновт сыылнаад локтoма да. Аскинас кутшoм на поводьяыс лоo.
Колo нин видз-му содтыштны, но кысь босьтан. Общиналoн ставсo юклoма, прoстыс абу.
Ур кыйыгoн Петыр Oнисьoм веськалiс сотчoминo. Чернас весалiс му веркoссo, пыдысьджык лэптiс му ёкмыль. Шамралo, видлалo. Лэдзис-гылooдiс чуньяс костoдыс: абу чув лыа, и сир сёйoн он шу. Нияпод. Татчo кo сютo кoдзан – вердас эськo няньнад. Мый кoть и абу ёна ыджыд сотчoмыс, дырoн паськoдчыштны позяс. Трундаoн вынсьoдыштны позяс мусo, абу тай ылын йoнoдoдзыс. Ляпкыд лымйoн вайны додь нёль-o-вит, мoд во унджык. Татчoдз куйoд вайoм оз ло, сiдз на оз суйтчы став му вылас. Сетасны кo тайo сотчoминсo зэв бур му эськo позяс вoчны. Добра крестьяниныдлы, кыдз шуласны. Лесничoй тшoктытoг он лысьт гoрны ни кoдзны. Ковмас на мерайтны ыдждасo, кабалаяс лoсьoдны. Дерт сетасны кo быттьo сотчoминсo. Ковмас ветлыны лесничoй дорo прoстджык кадo.
Тoвнас Oнисьoм лэччылiс Помoсдiнo лесничoй дорo, висьталiс могсo.
- Ладнo, тулыснас видзoдлам. – Вочавидзис чинаыд.
Тулыснас гoра-кoдза уджяс эштoм бoрын Oнисьoм мoдысь мунiс лесничoй дорo. Абу, мунoма кытчoкo аслас могъясoн. Луныс прoстo воши.
Видз вылo страдуйтны петтoдз бара, коймoдысь нин Oнисьoм мунiс лесничoй дорo.
- Сiйo сотчoмыд тэныд мыйлакo зэв ёна воoма сьoлoм вылад. – Наяна читкыралo синъяссo лесничoй. – Тэ, дядьo, эн-o ачыд oзтывлы? Сэтшoмторсьыд oд, тoдан кo, строго. Зэв чорыда мыждoны! – Горзьo гoлoсыс чинаыдлoн.
Нерад ишыoдчoмнад лои Oнисьoм.
- Мыйoн ме дoзмoдi мортсo? – Жугыля думайтo Oнисьoм гортас мунiгoн. – Кажитчo ме нинoм лёксo эг шу. Гашкo "мавтыштoм" виччысис чина мортыс?
- Ачым на мыжа, колo вoлoм кoть штоп дон мыччыны первой аддзысьлыгас. Мерайтчoм да кабалаяс гижoм бoрын абу грек и ёнджыка "мыськыштны", мед няньыс бурджыка быдмас. Аттo кутшoм бур му воштi! – Видo асьсo Oнисьoм. – Oнi сoткы кoть эн, мый пoльзаыс.
Мортыс некор эз вежавлы йoз добра вылo и первойсo юрас эз волы сэтшoм мoвпыс, мый колo вoлoм "мавтыштны" лесничoйтo.
Зэв нин важoн Вoльдiнса том морт ыджыдджык воксo йoйoн шуас юсянь ылo Бадьёльйылo овмoдчoмысь.
- Тэныд лoсьыд серавнытo. Кага ни баля, дась вылас на олан. Керка-карта, видз-му ставыс эм. А меным колo семьяoс вердны-юктавны, кoмoдны-пасьтoдны. – Дoзмас ыджыдджык вокыс. – Арнас видзoдлам коднымлoн няньыс бурджыка воас.
Ю дорад дерт унаторйoн бур. Турунтo позьo пурйoн вайны катыдса видзяс вылысь, чери кыйны, пес вылo кывтысь пу-лoпсo кутавны пыжoн, керка весьтад чукoртiн да прoстджык кадo позьo вундасьны, оз ков пес билет ньoбны и вoрын пoрoдчыны. Ю дорад тай кoдзаясыд частo кынмавлoны вотoдзыс на.
Сиктса йoзлoн видз-муысь oтдор вoлiны и кыйсян угоддьoяс. Арнас видз-му уджъяс эштoм бoрын лымъявтoдз позис кыйны вoрса пoткаяс лэчясoн и чoсъясoн. Кыян сэзон восьытoдз сиктъясoд ветлoдoлны купечяслoн приказчикяс, сёрнитчысны кыйысьяскoд кодi кутшoм пoтка и звер куяс кoсъяс вузавны и кутшoм донысь.
Урлн гoн чистoймoм бoрас позис заводитны найoс и мукoд зверъясoс кыйны. Дона куа зверъяс кыйoмыс вoлi медся бур нажеткаoн сиктса йoзлoн, звер куяс вузалoм бoрын вермисны вештыны вотъяс и мукoд уджйoз.
Лымва и Сьoдъю oтлаасянiнсянь неылын Исак Ёгорлoн вoр куркаыс. Сыысь катыдынджык дзик Сьoдъю бокас Вась Петырлoн. Керка гoгoрса вoръясын лэчтуйясыс. Вась Петыр велoдлiс пиянсo кыйсян уджас первой матыса лэчтуйяс вылын, гортсяньыс ветлoмoн. Сы бoрын нин батя-пиаяс мунлiсны Сьoдъю дорo. Вичмывлiс сiйo уджыс и Oнисьoмлы. Пиян быдмoны, семья лoсьoдoны. Быдoнлы колo аслас угодьo. А лэчтуйясoн паськoдчыны местаыс абу нин. Oнисьoмлы лэчтуйяссo ковмис лoсьoдны Вoль ю катыдын Ырoша ёль пoлoн. Пиян быдмыштoм бoрын ещo на содтыштiсны быд во, мед тырмис пиянлы юксиг кежo. Арбыднас вель уна пoтка шедлiс батя-пиаяслы. Черитo гымгаoн кыйлiсны и …
Сиктын кывсис кoнсюрo пo колхозъяс котырталoны. Юасьoны oта-мoдыслысь мый сiйo сэтшoмыс.
- Oтлаын пo став сиктса олысьыс уджалoны, гашкo oти вевт улын ставныс олoны и. Стoчсo некод нинoм оз тoд.
Воис сiйo "шудыс" и миян сиктo. Первой шуисны oтувтчыны ас кoсйoм серти. Но сэтшoмыс этша чукoрмис; сэсся мырдoн, грoзoн. Сиктса йoзыд лоины бытьo туй вожаланiнын. Мойд вылын моз oтар туйoдыс мунан вoвтo воштан, мoд туйoдыс - асьтo.
Артельнад уджалoмыд абу выльтор сиктса йoзлы. Помечoн уджавлiсны стрoйба тшупиг-лэптiгoн. Нянь вундыгoн медавлiсны слуга-казакoс кoзяевалoн поснидoсь на кo вoлi челядьыс. А мый сэтшoм колхозыс эз на адзывны и абу гoгoрвоана унатор.
Кодi и кыдз кутас уджсo котыртны?
Кутшoм удждоныс лоo, верман-o ассьыд семьятo вердны?
Ёна ызгисны скод вылын, юасисны, майшасисны.
Кодлы нo абу жаль аслад видз-муыд, вoлыд и мoскыд Oд мыйта кад да труд пуктoма некымын кoленалoн видз-мутo чер, зыр да зор помысь вoчoмас. Вoлыд первой отсасьысь крестьянинлoн, медся сьoкыд уджястo вoчысь-мыркысьыс. Вельдыр колo сiйoс быдтыны да уджавны велoдны. Сийoс кoлуйтo, гoр и агас, додь и телга абу жo дзик донтoм.
Кукань быдтыны, мoскoдз воoдны абу жo ёна кокни, кад да труд жo колo пуктыны.
Oнисьoм гозъялoн вoвясыд абу кулитанаoсь, ёнoсь, рамoсь. А мoсъясыс гырысь тушааoсь, сьoда –еджыда сераoсь, абу кизьoр йoлаoсь, енсыкoд.
Oгаш лун 10 кымын кукястo мамыс дiнын видзo, торйoдoм бoрас на соравтoм йoлoн вердo лун вит кымын, сы бoрын сэсся позьo и турун ва содтыштны йoв пиас.
Кодлы нo окота ассьыд овмoстo прoстo сетны? Но лоo на тай, бoрд да сет. Он кo пыр колхозас мырдясны видз-мутo, няньтo и турунтo; налогoн пoдтасны. Арнас челядьыдкoд вoр лэдзны ыстасны, ковмас рoспутаoдз вoр пoрoдны и аслад вoвясoн кыскыны ю дорoдз. Единоличниклoн лунся удж нормаыс 2 пoв ыджыдджык колхозник-сезонниклoн дорысь. Оз кo тыр тoвбыдся, сiдз шусяна твёрдoй заданиеыс верман и дзескыдiнo веськавны
Единоличниктo пo сiйo чиган вoвтo моз жo видзoны – курыда шмонитлoны ас кежас.
Чиганыд чань видзoма мужиклы, ёна ошкo сiйoс мед унджык деньга сетас: Тайo кoть и чань на, но зэв бур пoрoдаыс, зэв ён лоo быдмас да, и вердны оз ков, гежедика ваoн юктышт дай. Чаньыд сюсь и вoлoма, чужйыны и курчыны уськoдчo. Куш ва вылад тай oдйo жo раммис, сэсся и чечывнысo абу кутoма вермыны и кувсьoма.
- Дерт oд кутшoмкo висьoм топoдiс. - Думыштас мужикыд.
Синпoла Педoр Митрей зэв шмонитысь вoлi. Эз-o сiйo мойд чиган вoв йывсьыс? Сылoн письмo волoма рoдвужыслы зэв ылысянь. Ми пo "комсомолечяс" зэв ыджыд канава (Беломорканал) кодъям. Ковмылo и посньыджык гуяс кодйылыны. Ёртуй Керoсысь (шойна) некод на бoрсo абу волoма.
Коммунистъясыд юкисны "прoстoй" да "особoйяс" вылo. Шмонитoмысь, чинаяслы паныд кыв шуoмысь прoстoй морттo (уджалысьoс) коммунистъяс да активистъяс (особoйяс) вермисны некутшoм мыжтoг мыждыны ("тройкаяс"). Шуасны "комсомолечoн", пасьтoдасны визя паськoмoн, и уджав тшыг нисьo пoт кувтoдзыд.
Бурдлытoм сьoлoм дойoн лоины тайo вояс Петыр Oнисьoм гозъялы. Пырисны жo колхозад, он oд кут тюрмаас мунны. Рытнас локтан гортад колхознoй удж вывсьыд, он на удит керкаад пырны, вoлыд да мoскыд гoнеч локтoны; гoрдлoны, баксoны завор дорын. Вoзйысьoны эськo да он на йoрт. Бoрдыгтырйи аслыныс на и лои нуны скoтсo колхозса выль оланiнас. Скoт видзысьыс кo шогмана йoз бур на. А водзынкo аслас вoв ни мoс эз вoв?
Ионлы тай чин сетoмаoсь жo.
Oлексея (март 30-oд) лунo мoс лысьтысьяс элясьoны.
- Мoсъяс кукъясисны, а йoвным содoм пыдди чинo. Гашкo сёян нормасo содтыштны колo?
Председатель видзoдлiс турун чукoръяс вылo, чатoртчывлiс енэжас, чукыртлiс плешсo – быттьo мыйкo мoвпалo и артасьo.
- Вердoй без норму, рушкусьыс вывтi оз сёйны. – Сетo индoд Ионыд.
Ёгорейoдз (май 6-oд лун) тырмис туруныд.
Лымйыс абу на кушoдз сылoма, кор на и выль туруныс петас. Ковмис зорoд местаясысь курасьны, идзасoн вердчыны. Бoрд кoть серав, мед толькo некод оз кывлы, кысь нин эськo йoзлы кывмoн мыйкo шуны да.
А собрание вылад Ионыд речь лыддьo, быдлаысь быдтор тoдo. Нетолькo матыса сиктъясысь и район пасьтаысь. Быдлаo волo. Америкаад и Англияад, Китайo и Японияo. Быдлаын пo колo вoчны революция! Мед мусяр вылас быдлаын лои сёциализьм! Сы бoрын сэсся регыд и коммунизьмад воам: сёй и ю мый душаыдлы угоднo, кoмав – пасьтав мый кoсъян. И некутшoм дон вештытoг. Деньгаясыд пo сэки вопче оз ло.
Сиктса коммунистъяс тырoдoн стрoитoны социализм. Кулачитiсны Сава Тереньoс. Мырддисны видз-мусo, керкасo, став овмoссo.
Кoсйисны тьюрмаo мoдoдны. А, мед нин старикыс аслас пывсянын кулo, сэтчo тай овмoдчoма. Заводитлiсны и пиянсo дзескoдны, но эз удайтчы. Гражданскoй война кадo найo Краснoй Армияын служитлoмаoсь. Терень Мишсo век жo пуксьoдiсны быттьo пo вредительствоысь. Сыoн чoвтoм зорoдъясын пo туруныс особo сiсь. Татшoм ногoн нёль ая-пиалысь кык керкасo мырддисны. Oти керкаын лои колхозлoн правление, мoдсo "ньoбис" сиктсoветса пред Педoсьoй Петыр. Зэв ыджыд вoлoма жалoваньoыс чина мортыдлoн, сы ыджда керка коромина вермис ньoбны, регыдoн и вешмoма.
Код тoдас кутшoм аслас заслугаыс, вежoрыс и сямыс. Гашкo дась би дорын на шонтысьo, ньыв лыссo на эз вольсав, а сiдз дасьас на тoрoдчис ноддя дорас матoджык. Гражданскoй война дырйи мамыслысь витнан воксo белoйяс лыйлoмаoсь. На пиысь ыджыдджыкыс вoлoма Георгиевскoй крестъяса, японскoй война дырйи нин воюйтлoма. Сiдз тай вoлi Митрей Аннаыс висьталo-а.
Кулачитiсны Тима Васьoс.
Кoть и видз-муыс эз вoв Сава Терень ая-пианлoн мында. Керкаыс, кыдз и сиктса унджык йoзыслoн, кук жыръя – гожъян и тoвъян. Быд морт вылo oти мoс някoн эз тырмы. Мырддисны видз-мусo, скoтсo, няьсo, турунсo, весиг корoсь сёрйыс куш коли.
Дзескoдiсны зэв унаoс. Шобсьыгoн адзывлiсны кo дзебасысь пызь мешoк или тусь, горзiсны: "У-у гад! Нянь сiсьтo, а йoзыс тшыгъялoны! Татшoмъяссo лыйлыны колo!"
Активистъясoн вoлiны Демид Степан, Ёгор Oндрей, Пиля Миколай и мукoдъяс.
Крестьянин во гoгoр тiльсьo-уджалo мед семьяыс эз тшыгъяв. Локтасны карзысьясыд, грабитoны луншoра лунo да ещo грoзитчoны лыйлoмoн. Найo оз думыштлыны, мый мортыслoн челядьыс вермасны тшыглы кувны, нуoны став сёянсo, мый адзасны.
Эз чайтлыны "пернатoм сьылiяс", мый аслыныс бурыс оз жo ло. Йoз няньнад верман и виньдыны. Шулoны, бедьыд пo кык пома, вартан кo - oти помыс кодлы кo инмас, а мoд помыс – аслыд вермас швачкыны.
Оз жалитны коммунистъяс попъясoс, тьюрмаo йoршытoны, лыйлoны. Вичкояс, часовняяс грабитoны, тупъялoны. Кывсьo: Помoсдiн вичкоын - йoв завод, Деревннoйын - склад, Ручын – клуб.
Миян сиктса часовняын клуб лoсьoдлiсны жo. Завнас индiсны Епим Анна Габрилoс. Жалoваньoыс 15 трудодень тoлысьнас. Клуб восьсьывлo рытнас, тoвнас пoдласис кoдзыд вoсна.
Водзджык пачъяссo косявлoмаoсь, кирпичсo новлoмаoсь скoтнoй дворo, конюшня керкаo и мукoдлаo. Пачъяссo тэчны сямныс абу жo коммунистъяслoн, кирпичыс абу жo, сiйoс oд тoвнад он вoч.
Коммунистъяслы нинoм святoйыс абу – шуoны сиктса йoз. Ен вераo эскoм и став наукаяс пыдди лои марксизм-ленинизм.
Котыртiсны велoдчoм. Колхозын удж помасьoм бoрын рытнас велoдoны томoс и пoрысьoс. Неграмотнoйясыд пo оз сяммыны стрoитны социализмтo. Быд пусьысьлы пo колo кужны веськoдлыны государствоoн – шулoма Ленин.
Уна кулачитoмаoс вайисны роч муысь, oткаяс и семьяаяс. Овмoдiсны найoс уналаo сьoд вoр шoрo (Вой вож, Ындiн, Тимсер, лопъювад). Унаoн кувсьoмаoсь туяс тшыгла, кынмалoмысь, шогысла. Кувсьoны и спецпосёлокясын, локтoм бoрас.
Уджалoны сиктса йoз колхозын, нимыс "Выль Войвыв". Тoвбыд кер заптoны, куйoд кыскoны муяс вынсьoдны. Лым сылoм бoрын пoим вoчoны, сотoны ув чукoръяс, лoп, валежник ыб дорса расъясын. Сотoны и коткодзув каръяс. Найo любoй поводья бура сотчoны и пoимыс пo унджык чукoрмo. Муяс костысь межаяссo бырoдoны, эжасo чашйoны-весалoны кoпанечясoн, кoртзыръясoн. Ыбъяс гoрны тракторъяс регыд пo ваясны.
Видзяс вылын пoрлoдлoны пуяс, кустъяс кералoны. Колхозлы стрoитoны скoт картаяс, конюшняяс, склад. Бригадир волас тшупсьысьяс дорo, велoдас кыдзи колo вoчны уджсo. Председатель локтас – мoд ног тшoктo.
Пастукъяслoн мoсъяс пышйoмаoсь – став скoтничаыс и мужичoйяс корсьoны. Вoвяс пышйoмаoсь Сергей Петырoдз, матo кызь верст, корсьны и вайны жo колo. Ыжъясoс кoин джагйoдлoма, вирсo юoма. Вoвъясoс ош косявлoма.
Видз вылын зорoд сотчoма гымньoвсянь. Терень гумла дорын нянь тэчасo oзйывлoма.
Единоличник Епим Йoдoким первойoн тшынсo казялoма, тэчас пиньсo кералoма – пoрлoдлoма, абу лэдзoма биыслы паськавнысo, няньлы сотчыны. Няньoд, кoть и абу аслас, мый кoть и колхозлoн.
Нянь – сiйo мортлы вын-эбoс сетысь. Олoм кутысьыс. Кывйыс дженьыд и шунысo кокньыд. Дзоля кагаыд медводз вермo шуны "мам", сы бoрын тшoтшмоз "нёнь" и "нянь" кывъяс. Но мыйтта пoсь кисьтны лоo крестьянинлы, мед во гoгoр тырмис сiйo семьяыслы.
Мутo онкo куйoдав омoль лоo урожайыд
Сiдзкo унджык скoт колo видзны, видзяс паськoдны, пoскoтина лoсьoдны. Сэк няньыд и йoв-яйыд лоo. Олoмас тай ставыс oтлаo йитчoма кыссьoма. Oтилаты кo торъялас ставыс торксяс-дзугсяс.
Течас oзйылoмсьыс мыжаыс сюри. Председатель Oньo Гришалысь биасян тшак* аддзoмаoсь oшинь карниз костсьыс, шобсигад.
Морттo тюрмаo нуисны, мыжтoмсo.
* Сiйo тшакыс кыдзпу вылын быдмo. Перйoны, весалoны чорыд веркoссo и улысладорсo. Коляссo песoны-небзьoдoны кудель или вата кодьoдз. Тшаксo пуктoны биа из вылo и вачкoны тывкoртoн, сявкнитoны бикиньяс и тшакыс oгырасьыштo зэв дзоляника, пушкoм-пoлялoм бoрын позьo чигарка oзтыны. Тадзи биасьлoмаoсь кор спички вoчны оз на вoлoм кужны.
Быдлаo судзo коммунистъяслoн вирoсь лапаясыс. Кoсъясны кo медся пеж и омoль мортoс, а медбуръяссo йoртасны тюрмаo. Сiдз вoлoма сoветъяслысь власть котыртыгoн, а кор помасяс коммунистическoй самодержавиелo вывтiасьoмыс оз на тыдав.
Oнись Иван грездысь колхозса председатель Митрей Миколай велoдчывлoма Ульянаса манастырын восьтoм сельхозтехникумын. Судитiсны партийнoй дисциплина торкoмысь – урожай идравсьoм бoрын тшoктoма сетавны нянь (тусь) тшыгъялысь колхозникяслы, абу виччысьoма райкомлысь тшoктoм. Гашкo чайтiс, мый райкомсаяс оз тoдлыны медылыса грездсьыд нянь сеталoмтo.
Вoльдынса "Вoр фронт" колхоз лоoма ВДНХ-са участникoн видз-му вылын гырысь показательясысь. Збыль вылас ыджыд урожайыс лоoма гуся муяс тшoт весьтo. Шыша ыб и мукoд вoрса участокяс, сиктса йoзлoн вoвлoм муяс, эз лыддьысьны колхознoй муяс лыдын. Шыша ыбыс Расъёль кывтыдын нoрыс йылын миртуйсянь матын.
Абу лада олoмыс колхозъясын.
Коммунистъяс оз сяммыны уджсo котыртны. Кoдзан кад воас. Кутасны кoйдыссo сoвтны колхозникяс, а сiйo шогмытoм, уль вoлoма йoртoдас кисьталыгoн, мугoм гoрд рoма лоoма. Мoд йoртoдын бакшасьoма. Гожoмыс зэра вoлoма, зорoдъясын туруныс тшыкoма, мыжаoсь чoвтысьяс. Найoс судитoны.
Арын нянь идралoны. Кoйдысысь oтдор, став няньсo нуoны карсаясoс вердны. Кoйдыссo нуoны жo Заготзерно складo. Мед тшыг колхозникяс оз гусявлыны, налы oд посни коньoртусьыс да жугйыс и кольo.
Омoль вердаса колхознoй мoсъяс и куканьяс висьoны лишайoн, коъясныс слабoсь.
Вoвяслoн миненгит, первой ляснияссo йирoны, сэсся стенас кайны кутасны.
Начальстволы ставыс ясыд – вредительство! Судитны колo! Кодoс? Кодi син водзаныс веськалo. Кодi коркo паныда кыв шулiс бригадирлы, председательлы, райкомса уполномоченнoйлы. Или кодoс удтасны-соритасны активистъяс. А найo вермасны любoйoс лякны, водзoс босьтны чинаяслoн вытiасьыгoн найoйoс oлoдoмысь, пoкмеля дырйи вина румка сеттoмысь. Кoсйoмныс кo эм помкаыд век сюрас.
Троица асылo миртуй вылын бус кыптoм казялo Oгаш. Сэсся мыйкo сьoд мыччысис кузнеча весьтын.
- Oнисьoм, видзoдлы кутшoмкo антус муркo-локтo, сьoд тшынoн пoлясьo.
- Тайo дерт тракторыд и эм. – Шуo Oнисьoм. – Максим зять тай висьталo вoлi, таво пo тракторoн кутасны гoрны. Сiйo пo вoвсьыд ёнджык. Сiйo кoнкo правленье дорo мунiс. Собраньo лоo. Вай ми ветлам жo сэтчo.
Петiсны. Мургoм шыыс матын нин кылo. Сэсся и мыччысис "антусыд", потшoс дорo сатш сувтiс и лoнис. Максим зять пинджаксo пoрччис, пыркoдo буссo. Опонь пиныс пуклoс вылас на пукалo. Кoлуйыс и чужoмыс сьoд нисьo руд., толькo пиньясыс еджыдoсь.
Видзoдoны Oнисьoм гозъя аддзывтoм дивo вылo, шензьoмысла кывныс оз сюр.
- "Вoвнытo" абу туруналoмныд да домавтoгыд пышяс. – Шмонитo Oнисьoм.
- О-оз, тайo "вoлыд" уджалыгас толькo сёйo. – Вашялo Опонь.
Гозъя видзoдалoны трактортo быд боксянь. Нимкодясьoны, асланыс быттасыс oд кужo веськoдлыны сiйoн. Медводзаoн асланыс сиктын. Максим зятьлы аттьo колo шуны, сiйo тай шуoны, велoдo МТС-ас трактор вылас уджавны.
- Матoджык жo эськo "вoвнытo" сувтoдoмныд да. – Шуo Oгаш. – Струбаыд буждыны вермас.
- Неладнo и лоoма. – Сoгласа шуo зятьыс. – Час заводитлам да ылoджык сувтoдлам.
- Oнi мед нин сулалo, оз тай чапась. – Шуo Oнисьoм. Ачыс нюмялo. – Пырoй шойччoй.
А йoзыс! Зонпосни медводз котooн локтiсны. Локтoмаoсь том и пoрысь, мужичейяс и нывбабаяс. Ставныслы окота быдтор тoдны: зэв-o ён, мый и уна сёйo, кутшoм уджяс вермo вoчны, кыдзи кывзысьo кoзяинсo?
Смелджык зонъяс кинас инмoдчылoны, шоныд – бытьo ловъя. Унджык юалoм вылас Максимлы лоo вочавидзны, сiйo oд унджык тoдo и кужo, машинаяс дорад уджавлoма нин кер лэдзысьяскoд. Сиктысь, гашкo, став йoзыс волiсны кoрт "вoвтo" видзoдлыны.
Весьшoрo на лоoма радлoмыс Oнисьoм гозъялoн. Сьoкыд вoлi тайo тулысыс Опоньлы, вывтi сьoкыд. Омoльтчис весиг мортыс. Уджалiс водз асывсянь сёр рытoдз. Локтас удж вывсьыд рудзмунoма. Кoлуйсo вежас, мыссяс, пуксяс ужнайтны. Сёйыгас синъясыс куньсьoны, паньыс кисьыс усьo.
Ыбъяс эськo паськыдoсь. Межаясы падмoдoны, эжа гoрыштны сьoкыд. Мукoд межаас пуяс, кустъяс, гырысь изъяс, найoс ордйыны лоo. Увтас местаясын ваыс дыр пукалoма, абу на косьмoма, сибдo тракторыд.
Дзик первойтo велавтoдзыд абу кокни уджавнысo. Велoдысьыс эськo тырмo да, оз и бырлы гoригад. Бригадир локтo – велoдo, председатель, райкомса "упал намоченный", МТС-са "коммис сар" (политотделса). Ставныс велooны, кoть и асьныс этша мый тoдoны.
- Тракторсo сутки чoж колo уджoдны!
- Тувсовъя луныд пo во вердo!
- Кык смена лoсьoдны колo!
Трактористъяс оз тырмыны, велoдны на колo. Oдва и помасис гoра-кoдзаыс.
Тулысбыднас уна и сьoд трактор няйт ковмис мыськыны Oгашлы. Вель унаысь кунва вoчны ковмылiс (Oгашлы). Кысь нo уна майтoгыс сиктад.
Иван важoн гoтыра, Епим Маряыскoд пи быдтoны - Федя. Паладь верoссайын, Максим зятькoд пи жo быдтoны – Ваньo. Вась нин кoсйo гoтрасьны, ачыс эз на висьтавлi. Oнi кер лэдзo. Невестаыс пo Югыдтыдорысь, Ёгор Опоньлoн медыджыд нылыс. Верoссайын кыкысь нин вoлoма. Oти мужик дорсьыс пышйывлoма, а мoдыс, кер дорын уджалiгoн доймoмсянь, кувлoма. Прамoя дoзмывлiс Oгаш, но некодлы эз петкoдлi ассьыс майшасьoмсo, весиг Oнисьoмлы.
- Наян дoваыс, ассьыс томджык зонoс крукыштo. – Думайтo Oгаш. – Смилитoма али мый Васьoс?
Бать-мамсo йoзыс эськo оз кулитны, кoть и сьoкыда жo быдтысьoмаoсь. Ёгор Опоньыс германскoй война вылын вoлoма жo, пленo веськвалoма и. Сы костты гoтырыс нёль посни челядьoн мырсьoма-олoма. Гожoм-арнас слугаoс медавлoма. Он oд буракo дзикoдз лэдзчысь скoтсьыд да видз-мусьыд.
Верoс локтoм бoрас регыд и кувсяс гoтырыс. Мoдысь гoтрасяс Ёгор Опонь, Выльгртысь Ларуш Педoр Давид нылoс ваяс. Бара вит ныла-пиа содo. Дасысь унджык эськo чукoрмис челядьыс, кулысьыс кo эз вoв. Чойяс пиас Мариныс медыджыд и дoва нин, Вась дорo тай и сибдoма.
Тулыснас Вась локтiс кер дорысь.
- Тэ пиo, гoтрасьны нин пo кoсъян? – Юасьo Oнисьoм.
- Кад нин oд, абу дас нёль арoса. – Вочавидзo пиыс.
- Гoтырпуыд пo ылi сиктысь. – Шуo мамыс.
- Кутшoмкo бoжтoм катша сoрoма нин.
- Битoгыс пo тшыныс оз овлы. Ас сиктас нылыс этша али мый? – Дoжныштo батьыс.
- Мo тай абу жo танi чужлoма.
- Сiйoтo сiдз. А кoнi кутанныд овны? Керканыд вылo йыла на да. – Шуo Oнисьoм. – Ачыд унджык кадсo бокын олан-а.
- Сельсoветса предкoд сёрнитлiм, Сергей Петырлысь вoвлoм керкасo сетны кoсйис, дерт, оз пасибo вылo.
- Корнo эськo гoтрасьнысo кoсъян?
- Кор бать-мам тшoктасны. Кoть талун туяс пета, тшoктанныд кoo.
- Кылан, Oгаш, мый тэныд шуo?
- Аслас делo. Эз тай ков корасьны. Аслыс oд ваяс, оз кодлыкo.
- Аслым дерт. – Шпыннялo Вась.
- Кoть oд oти лун шойччан жo. Талун пывсян-мыссян да.
Вайис oд, кoчаныд. Пуръясьoмыс эштoма да сэссянь тшoтш и локтiсны.
Соседъяслы мог суoма. Кодкo сов водзoсавны пыравлас, мукoдъясoс тожo быттьo мог суoма. Сёрoн кодь нин и муналiсны.
- Выль моньтo видзoдлыны вель унаoн волiсны. – Шуo Oнисьoм.
- Мед, абу тай сера и сюра. – Вочавидз Oгаш.
А Вась нинoм оз шу, нюмъялo.
Oгаш некор эз кoсйывлi кедзовтны-жегдыны моньяссo. И оз кут. Асьныс кo гозъя ладмoны мыйла мешайтнысo. Верoсыд кo санас-видас да ещo кинас на воас (а мужичoй киыд чорыд), и инька-айкаыд синкым увтыыс букыша видзoдoны, сэк моньыдлoн абу нин олoм. Он oд быд здукo котoрт мамыд дорo норасьны, мамыд кo ещo мoд, ылы сиктын.
Верoсыдлы абу жo кокнидджык. Бать-мам дор шыoдчан – гoтырыд oбoдитчас. Гoтыр дор шыoдчан – бать-мамыд дoзмасны, ещo ёнджыка кутасны кедзовтны гoтыртo. Аслад бать-мамыд жальoсь, и гoтырыд аслад жo. Гoтыртo он кo кут морттуйo пуктыны оз и ло гoтырoн, а слугаoн лоo. Слугаыдлoн кагаяс чужасны да мыйoн лоасны быдмoм бoрас? Слуга-казакoн? Енмыс мед видзас жo сэтшoм торсьыс. Эмoсь тай сэтшoм семьяясыс сиктын, асывсяньыс карзoны, велoдoны oта-мoднысo, а тoлк ни лад абу. Юрыс оз тoд, мый киясыс вoчoны, и мый кывныс "изo". Удж бoрын брызьгасны зыр кoть вила кытчo веськалo, мoд лунo ковмас да оз тoдны кытысь корсьны.
Лoсьoдчoны видз вылo муннв. Куранъясыд лэбулас абу веськавлoмаoсь, воймoмаoсь. Косаясыд тубраснас тoвйoмаoсь. Тoчитiгас доръясыс чукталoны, сiмыс "сёйoма"э
Зорoдъясад туруныс тшыкoма. Лыд вoчысьясыд турунсo косьмытoдзыс куртлoмаoсь. Бара сoткoны-видчoны, кодкo мыжа, абу асьныс.
Пачыд оз шонавлы, пескыд бакшасьoма – выль тoлысьын керавлoмаoсь.
Пиля Микайлoлoн тарантасыс оз дзурт, а карзысьясыдлoн кык кoлесааыс варов (дзуртo).
Рыт-асывнас инькаа-моня тшoтш уджалoны ас овмoсын. Сибалo тай моньыс быд удж вoчны, зэв дзувкoс, абу кыввортoм ни. Медыджыд нылыдлы медся уна жo и сюрлoма визны посниджык чой-воксo, горт гoгoрса уджяссo вoчны и кер дор уджыс нин вичмылoма. Пачвом дорад моньястo инькаясыд оз зэв сибoдны. А Oгашлы окота тoдны кыдзи кужo моньыс пусьыны и пoжасьны.
Oгаш асывнас лoсьoдiс моньлы шаньга кучикъяс вoсньoдны, ачыс петiс гидo.
Пырис йoв пoдoнчаoн. Пач ломтысьo, картупель регыд пусяс. Моньлoн шаньга кучкяс быттьo артмoны, доръясыс абу потасoсь.
Мoскoс лудo нуoм бoрын нин Oгаш локтiс моньлы отсасьны. Сiйo бoръя шаньгасo нин тыралo, вылысъясыс шыльыдкодь. Вылас серыс, шуласны тай. А кутшoм кoрыс?
Oнисьoм пырo завтракайтны, удитoма нин мыйкo уджыштны. Oгаш шаньгаяс мавтo.
- Инька-моня тшетшкoдчoнi али мый?- Юалo.
- Мыйла?
- Моньыд тай довкoс кажитчис, вала петiс да.
- Ачыд на мыжа. – Ропкыштiс Oгаш. – Висьтавлi нин oд, нянь зыр лоптыс сотчалoма и чукталo. Кык шаньга пo тшыкoдi, шуo моньыд.
- Эн жo кoнкo помoй ведраo чoвт?
- Няньсo? Важoн-o ми сэтшoма озырмим няньoн шыбласьмoн.
- Сiдз кo эн ёнасo бротки, мавтышт oдйoджык "тшыкoмяссo".
Монь пырo ва тырoн. Айка шаньга сёйo, нюмъялo.
- Тэ тай, моньo, зэв чoскыда пoжасьны кужан. Ме эськo Oгашoс и пoжалiг и чайтi, эз кo ciйo висьтав. Мoдысь кo татшoмыс лоo, ме и кута сёйны. Чукoрoсьас oд выйыс унджык oшйo, сiдз кo и сoскыдджык на. Айка шаньгаoн и кутам шуны. Позьo и пoльo шаньгаoн, ме oд пoль нин.
Моньлoн синъясыс вазьoны, вот-вот бoрдзяс радысла. Гашкo и чышкалiс на синвасo пельсаo васo кисьталiгoн. "Абу на лёк йoз дорo веськавсьoма, оз тай менo кедзовтны Василейлoн бать-мамыс".
Регыдoн и ладмисны инька-моня.
-Тi быттьo абу инька да монь. – Шмонитo Oнисьoм. – Кык пoдруга быттьo, матыса рoдняяс ли.
- Сир пинь горшад, эн вомдзав миянoс. – Быттьo дoзмoмпырысь ропкыштo Oгаш. – Oнi рoдняяс нин, кык пoвста на-а. Мариналoн мамыс Лымваысь жo вoлoма. А дзоля грездад унджыкыс рoдняяс, кoть и абу дзик матыса.
- Сiдз дерт. – Сералo Oнисьoм. – Адам да Евасянь кo лыддьoдлыны. Водoй, унныд оз веськав да луннас вугравны кутаннныд. Шoпкoдчанныд быд рыт.
Тoвнас кер дорад да тулыснас пуръясигoн жoника-невесталoн сьoмтор чoжсьыштoма. Ньoбисны овтoм керка 700 сайo чoлкoвoйысь. Кодкo мырсьoма-стрoитoма, а сельсoветлoн лоoма. Колiс на дзоньтавны и пелькoдны дыр нин овтoм керкасo. Нуисны ассьыныс вoвлoм рынышсo, сыысь гид лэптiсны керка бокас. Позяс сюръяяс вылo лэбув вoчны стын бокас, вевтсo oтлаoдны гидыскoд и бур лоас. Карта oдзoс водзас оз кут лымъявны и лэбулас пес кoть турун пуктыны позяс. Пывсян лэптoм эз на ло. Матын оль вылас кoзяинтoм пывсян эм, сiйoн позяс пoльзуйтчыны выльсo вoчтoдз. Вевтсo дзоньталыштны, горсo выльысь тэчны колo. Регыд кадoн став коланасo он удит вoчны. Быдлаo труд да кад колo пуктыны. Максим зять вель ёна отсасис карта кoлуй вoчoмoн. Укват, коколюка, пач пoдан и уна мукoдтор вoчис мастер мортыд. Быдтор лавкаысь ньoбны он вермы да уна колантор абу.
Позьo нин овмoдчыны Вась гозъялы выльлаo. Кыдзи сяммасны овнысo-а? вась сiйo крут-сердит батьыс кодь, oдйo дoзмo быд нинoм абысьыс, регыд жo и раммo. Удж вывсьыд локтас мыдзoма, тшыг, да ещo кодкo дoзмoдoма кo – виччысь. Гoтырыс оз кo удит ужин лoсьoдны или мыйкo не сы ног шусяс – пыр и певйыштас. Кoчана, ачыс оз-кo и тoдлы-а. здук мысти бара нин раммoма.
- Марин, тэ дoзмин али мый? Вай огo лoгасьoй, сiдз на сьoкыд овнысo.
Овмoдчисны гозъя асланыс керкаo. Oти жыр да шoр посводзас посъяс вoлoма. Асывладор жырйын йирк ни джодж эз вoв, oшиньясыс куричавтoм.
Выль гозъялы инька-айкаыс сетiсны арoн-джынйoна кукань. Мoскыд ковмас, гозъяыдлo челядь лоас.
Гозъя уджалoны колхозын.
Тoвнас Вась бара кер лэдзo, тулыснас пуръясьo. Гозъялы гежoда и сюрлo oтлаас овны. Тoвшoрнас ещo на ылoджык кытчo кo Печера вылo мooiсны Васьoс.
2001-oд во. Февраль, март.