ЮГЫДТЫДОРСАЛÖН ТÖЖДЪЯС.

   Кыдз Коми Республикаса Юралысьлöн общественнöй приёмнöйöн веськöдлысь тшöкыда ветлывла сикт-посёлокъясö, медым тöдны йöзлысь майшöгъяссö да кыдзкö отсавны найöс решитны районса либö республикаса власьт отсöгöн.
   Сентябр шöрын мойвиис ветлыны ылi грездö - Югыдтыдорö. Сэнi олö 27 морт, кызвыныс - олöма йöз. Ставыс 13 овмöс. Oкмыс мортыс - 45-öдз арлыдаöсь. Мужичöйяс прöмышляйтöны вöрын, а нывбабаяс бергалöны горт гöгöрын. Нёль овмöсын видзöны на скöт.
   Олöма йöз шуöны, мый весиг оз и вуджöдлыны часi, кор тулыс-арнас вежлывлöны кадсö. Но олöмсьыс оз кольччыны. Oткымынöн ньöбöмаöсь спутникöвöй "тасьтiяс" да видзöдöны унапöлöс программа, миян дорысь на унджык тöдöны.
   Майбыр, мича вöр-ваыс да сöстöм сынöдыс гажöдöны югыдтыдорсаяслысь олöмсö. Но унаöн шуасисны, мый, поштаысь кындзи, найöс ставöн вунöдiсны. Районса öнiя юралысь пö эз на и волы, а ми пö сiйöс ёна виччысям. Магазин тупкысьлöма нин тöвнас, сёян вайлывлöны поштакöд да кодi кыдзи вермас. Таксофон неважöн жугалöма да, йитöд эз вöв. Пошта вайлöны тöлысьнас öтчыд пенсиякöд тшöтш. Би абу, и югыдтыдорсаяс ставныс босьтöмаöсь генераторъяс, медым дзикöдз оз кольны олöмсьыс. Луннас да рытнас ас биöн видзöдöны телевизор. Тшай пузьöдöны öгыра самöварöн, пусьöны пачын. Со тадзи и олöны, ылi дi вылын моз. Сьöкыдлунъясыс абу чорзьöдöмаöсь сьöлöмнысö, йöзыс танi вежавидзысьöсь, зiльöсь, варовöсь да шаньöсь.
   Кулöмдiнö воöм бöрын ме пыр жö пыравлi районса юралысь С.П.Каплин дорö да висьталi югыдтыдорсаяслысь майшасьöмъяссö. Сергей Петрович шуис, мый Югыдтыдор йылысь сiйö эз вунöд, но куш киöн яндзим мунны ылi грездö.
   Тöвнас кöсйö кайлыны на дорö. Юралысь босьтiс тöд вылö грездсалысь корöмъяссö да, мыйöн вермас, отсалас. С.П.Каплинлöн индöм бöрын телефона йитöд лоис. Кутам надея, мый и мукöдторйыс вочасöн ладмас.

Антонина КУЗНЕЦОВА,
Коми Республикаса Юралысьлoн
Кулoмдiнын общественнoй приёмнoйoн
веськoдлысь.

Парма гор
04.10.2008

Отредактировано Vladimir (08.10.2008 22:44:17)